VOV4.Xơ Đăng - Kơxo lơ 19/5, a Plông kân Đại Đoàn Kết, Tĭnh ŭy, Hô̆i đong kuăn pơlê, Vi ƀan kuăn pơlê, Vi ƀan Măt trâ̆n tơnêi têa Việt Nam kong pơlê Gia Lai tơkŭm po kân krip leh koh hlá cơ klăng leh tơbâ 132 hơnăm hâi kot mâ Pôa Hồ Chí Minh, Kăn xiâm hnê ngăn tơnêi têa hneăng apoăng (19/5/1890 – 19/5/2022) ƀă 90 hơnăm Hâi mơjiâng kong pơlê Gia Lai (24/5/1932 – 24/5/2022).

Tíu po kân krip dêi Leh koh hlá cơ a Plông kân Đại Đoàn Kết

Tung tơdroăng po kân krip, Hlá cơ hiăng châ khu lêng kong pơlê Gia Lai râng mot a kơpong tíu leh ƀă tơkŭm po leh koh hlá cơ. A leh koh hlá cơ Tơnêi têa, khu lêng kong pơlê Gia Lai hiăng prôk pơtăng kheăn kơdeăn khu lêng a Um meăn Pôa Hồ ƀă mâu hdroâng kuăn ngo Tây Nguyên. Mơhno ‘na môi khu lêng ƀeăn ƀĕng, rơkê, đi đo kân rơdêi tŭm tơdroăng, đi đo môi tuăn ƀă Đảng, ƀă tơdroăng cheăng kăch măng hdroâng kuăn ngo. Klêi kơ’nâi leh koh hlá cơ, khu râ kăn pơkuâ kong pơlê Gia Lai hiăng pleăng rơvĭu reăng, chôu nhâng tơbâ Pôa Hồ.

A Sa Ly tơplôu ƀă tơbleăng