Péa ngế droh phô̆m xông kân a ƀuôn Ia Nan, cheăm Ia Rsai, tơring Krông Pa, kong pơlê Gia Lai hiăng mơhúa châ tŏng xo mơngế hluăn xía vâ drêng tro kreăng tung dế têa kân lân lu hiu têi. Kơxê lơ 2/8, ai 2 ngế o cho Rơ Ô H’Bái, 14 hơnăm ƀă Rahlan H’Mơn, 15 hơnăm lăm a chiâk deăng mê trâm kong mêi kân.

Drêng hlo têa kân lân lu hiu têi, prế o ối prôk tơkâ hluâ têa krông Ea Rsai vâ vêh a hngêi. Troh tung dế têa mê prế o tro kreăng ôh tá chiâng vâ prôk xếo. Klêi kơ’nâi tâng tối tơbleăng, Khu hnê mơhno Hbrâ ví kong mêi khía mơhot – Ti tăng tŏng xo mơngế hliăng tiâ dêi cheăm Ia Rsai hiăng mơhnhôk khu Kŏng an cheăm rơtế ƀă mâu vâi rơtăm tung pơlê Ia Nan troh a mê vâ tŏng xo.

Khu tŏng xo hiăng xúa ếo ki đông pêng têa ƀă kơxái vâ prôk troh a tíu dêi péa ngế o tro kreăng. Klêi kơ’nâi hên tơdroăng mơ-eăm, prế o hiăng châ djâ a kĭng tơniăn.