Ki nhên, dâng 14 chôu hâi lơ 2/10, ai 4 ngế phô̆m vâ xông kân lăm kơ’nêi ro, tơkâ têa plông kơpong Xí 2, ối tung cheăm Ia Blứ, vâ vêh a hngêi. Drêng ối tung dế têa plông, mê têa plông kơdrâ tâk đik, 1 ngế muăn teăm lăm troh a kĭng, 3 ngế muăn tro kreăng tung dế têa plông. Klêi tâng tơdroăng mê, khu ki tŏng xo mâu ngế hliăng tiâ dêi Kŏng an kong pơlê Gia Lai, tung mê ai 9 ngế kăn ƀô̆, lêng pơtroh mâu kế tơmeăm ki vâ tŏng xo ƀă tơdroăng ki xúa kơxái ki vâ râng tơdế têa plông, kât kơxái a rêm ngế muăn vâ djâ troh a kĭng.

Drêng kố, ai 1 ngế muăn xua xâu luâ râ, mê chiâng châ têa mơhiu môi iâ, la mơhúa châ khu lêng tŏng xo klê tiô xo teăm tơdrêng. Troh 5 chôu 45 phut kơxê, tá 3 ngế muăn mê pơrá hiăng châ tŏng xo djâ troh a kĭng tơniăn.