VOV4.Xơ Đăng - Kơxo kố a Hà Nội, tơkŭm po Hneăng hôp hlê plĕng tŭm ƀă po rơdâ pêi pro Pơkâ 06 dêi Khu xiâm kal kí hâi lơ 24/1/2022 ‘’ ‘Na pơkâ mơjiâng pơkuâ ƀă mơdêk krá tơniăn tíu xiâm kơdrâm kuăn pơlê rêh ối, tê mơdró Việt Nam troh hơnăm 2030 tơmiât troh hơnăm 2045’’. Tiô xêo dêi Kơ koan xiâm ‘na kế tơmeăm khoăng, kơxô̆ tíu mơnhông mơdêk chiâng tíu xiâm kơdrâm kuăn pơlê rêh ối tê mơdró a Việt Nam hơnăm 2010 cho 30,39%, troh hơnăm 2020 cho 36,8%.

Tơdroăng pro mơnhông chiâng tíu xiâm kơdrâm kuăn pơlê rêh ối tê mơdró ai rơdêi a 2 kơpong cheăng kâ – rêh ối pơlê pơla ki kal mê cho kơpong Tơbăng kroăng Hồng ƀă kơpong peăng mâ hâi lo pá Hdroh tơnêi têa, iâ má môi a kơpong peăng Tơdế kong ngo peăng Kơnhŏng tơnêi têa.

Pro mơnhông mơdêk tíu xiâm kơdrâm kuăn pơlê rêh ối tê mơdró ƀă mơnhông mơdêk tíu kơdrâm kuăn pơlê rêh ối tê mơdró pro tơ’lêi hlâu ăm mơnhông mơdêk cheăng kâ – rêh ối pơlê pơla, thăm mơnhông pơ’lêh cheăng kâ ƀă pơ’lêh tung pêi cheăng tiô troăng kơmăi kơmok tiô rơxông nếo, hbrâ kơmăi kơmok pêi cheăng rơxông nếo; tơdroăng mơnhông mơdêk dêi mâu tíu kơdrâm kuăn pơlê rêh ối tê mơdró hiăng mơhnhôk mơdêk cheăng kâ – rêh ối pơlê pơla a kơpong thông pơlê.

Laga, pakĭng mâu tơdroăng châ tơƀrê hiăng châ hôm ối ai mâu tơdroăng ối tơvâ tơvân, tá hâi tro tung mơjiâng tíu kơdrâm kuăn pơlê rêh ối tê mơdró nôkố. Ki nhên khât kố dế pơkâ ăm mâu kơvâ cheăng kal ai troăng tơdâng tơ’mô vâ mơnhông mơdêk tíu kơdrâm kuăn pơlê rêh – tê mơdró kân chiâng mâu tíu ki tơtêk; hriăn plĕng tơbleăng troăng pơkâ krê tung mơjiâng tíu kơdrâm kuăn pơlê rêh ối tê mơdró.

A Sa Ly tơplôu ƀă tơbleăng