VOV4.Xơ Đăng - Tơdroăng dêi Ngế pro xiâm hnê ngăn Chin phuh trâm mâ, tơpui tơno ƀă kŏng nhân ki pêi cheăng pơxá “Kŏng nhân Việt Nam ƀă tơdroăng púi vâ mơnhông tơnêi têa” kô po a lơ 12/6 a kong pơlê Bắc Giang. Kố cho tơdroăng tối a rôh hôp ƀă khu chêh hlá tơbeăng dêi Khu xiâm ngăn mơngế pêi cheăng Việt Nam tơkŭm po a Hà Nội.

A rôh hôp ƀă khu chêh hlá tơbeăng, teăng mâ Khu xiâm ngăn mơngế pêi cheăng Việt Nam ăm ‘nâi:  Tơdroăng pơtroh ăm Ngế pro xiâm hnê ngăn Chin phuh trâm mâ, tơpui tơno ƀă mâu kŏng nhân pêi cheăng kô ai 4 rơpâu 500 ngế pêi cheăng veăng trâm mâ a kong pơlê Bắc Giang ƀă trâm tơpui tiô troăng hyôh Internet a 63 tíu mơ’no tung hyôh um tơvi dêi mâu kong pơlê, pơlê kong kân tung lâp tơnêi têa.

Kố cho hneăng trâm mâ vâ mâu đoân viên, kŏng nhân ki pêi cheăng trâm, tơpui tối tơdroăng tơná tơmiât, tơdroăng púi vâ ƀă pâ thế, tối mâu tơdroăng tơdjâk troh pêi cheăng, tơdroăng rêh ối ƀă mơngế ki xiâm pơkuâ Chin phuh. Ngế pro xiâm hnê ngăn Chin phuh kô tơmâng, hnê mơhno tơleăng mơnhên mâu tơdroăng vâ mơngế pêi cheăng tối.

Gương tơplôu ƀă tơbleăng