VOV4.Xơ Đăng - Tiô tơdroăng Hneăng hôp má 3, Kuô̆k hô̆i hneăng XV, hâi lơ 27/5, Kuô̆k hô̆i pơtối pêi cheăng a Hngêi hôp kân, tơpui tơno ‘na mâu tơdroăng tơkêa bro Luât. Peăng kơxo, Kuô̆k hô̆i tơmâng jâ Phạm Thị Thanh Trà, Ngế xiâm pơkuâ kăn ƀô̆, pôu râng hnoăng pơcháu dêi Ngế pro xiâm hnê ngăn Chin phuh tơbleăng Mơ-éa tơdroăng tơkêa bro Luât pêi pro kuăn pơlê pơkuâ dêi hnoăng a tíu cheăng.

Pơtối mê, pôa Hoàng Thanh Tùng, Kăn pơkuâ Vi ƀan luât dêi Kuô̆k hô̆i pơchuât mơ-éa tơbleăng séa ngăn tơdroăng tơkêa bro luât kố. Kơ’nâi mê, Kuô̆k hô̆i tơmâng jâ Nguyễn Thúy Anh, Kăn cheăng tung Vi ƀan pơkuâ Kuô̆k hô̆i, Kăn pơkuâ Vi ƀan pơlê pơla dêi Kuô̆k hô̆i pơchuât tơbleăng tiâ tối, tơmâng xo rơkong tơpui tối, ‘mâi rơnêu tơdroăng tơkêa bro Luât tơ’noăng, kheăn kơdeăn.

Kuô̆k hô̆i tơpui tơno a hngêi hôp kân ‘na mâu tơdroăng xiâm rơkong tơpui phá tơ-ê dêi pó dêi tơdroăng tơkêa bro Luât tơ’noăng, kheăn kơdeăn.

A Sa Ly tơplôu ƀă tơbleăng