Râng kŏng dêi kuăn prôk chêng drô chiâk deăng kơphế dế rơnó reăng tơpo rơbông thâl  a môi tíu ôm hyô châ tâ châ hlo ‘na pêi chiâk deăng a Dak Lak, nâ Nguyễn Thị Phương Phương, ối a pơlê kong kơdrâm Đà Lạt, kong pơlê Lâm Đồng châ hlo reăng kơphế bông thâl lĕm, pơchó kŏng ăm dêi kuăn ngăn oăng dế kơhnâ lăm hrik têa ngeăm reăng vâ pro têa kơdruâ. Nâ Phương tối, á nah xuân cho mơngế pêi kơphế xua mê rêm rơnó reăng môi tiah kố, mâu tơdroăng tơbâ roh ton nah pơtối troh.

‘’Kơdrum kơphế ƀă hên reăng ƀă xú hŏm lĕm mê tâ rơrêk tung hiêm mơno ‘na môi rơnó hơtô hiăng vâ troh xuân hlo tung châ chăn, xua mê á hâk vâ ‘nâng. Hngêi á ôh tá ai chiâk deăng xếo xua mê nôkố ai kuăn ối kŭn mê á xuân hmâ troh mâu tíu môi tiah kố, ai reăng, ai xiâm loăng kơphế vâ mâu kuăn châ tâ châ hlo, châ tâ khôi túa lĕm tro xuân môi tiah tơdroăng a Tây Nguyên’’.

Bă kong prâi hơtô, rơtế ƀă kơphế, hên xiâm loăng ki ai xêh a Dak Lak ƀă tá Tây Nguyên xuân dế hŭn rơmôe, tơpo reăng, khế 3 chiâng ‘’rơnó oăng bro têa kơdruâ’’. Xúa ki ai tơ’lêi kố, hên tíu pêi oom hyô a kong pơlê hiăng po mâu tour ôm hyô ƀă châ tâ, châ hlo khôi túa lĕm ƀă veăng tung tíu pêi cheăng dêi mơngế kuăn pơlê pêi chiâk deăng. Pakĭng kơphế, mâu tíu ai kong kế lĕm mơnâ mâ ngăn, tíu ôm hyô ki má môi a Dak Lak xuân pro tơmối hâk vâ. Pôa Lò Hải Phan, ối a pơlê kong kơdrâm Sơn La, kong pơlê Sơn La tối ăm ‘nâi:

‘’Troăng prôk roh kố cho 5 kơmăng 4 hâi, lăm mâu tíu ki xiâm, mâu tíu chô ‘măn tơmeăm khoăng roh ton nah a pơlê kong kơdrâm Ƀuôn Ma Thuột, klêi mê lăm Ƀuôn Đôn, lăm xí Drai Nhur. Tâ ki kơnâ, ki má môi cho rêm tíu pơrá ai môi tíu ki phá tơ-ê, tá mâu kơchâi kâ cho tơtro ‘nâng’’.

Ƀă pôa Nguyễn Đình Hùng, troh ing pơlê kong xiâm Hà Nội mê tâ:

‘’Troh Dak Lak mê á lăm pôu Tíu chô ‘măn tơmeăm khoăng roh ton nah Dak Lak, Pơlê kơphế Trung Nguyên, kơpong ôm hyô Ko Tam, troh long têa Lắk. Á tâ hâk vâ, kong prâi a kố rơnguôt lĕm, kong ngiêt lĕm ƀă kuăn pơlê hâk vâ tơmối. Tá mâu rui xuân pro ăm á ôh tá kâi hiêt, cho lĕm ‘nâng ƀă tơ’lêi achê’’.

Tung troăng prôk ti tăng plĕng ngăn kong kế, tơmối troh Dak Lak xuân châ tâ khôi túa lĕm dêi mâu hdroâng kuăn ngo a kố. A mâu kơpong ôm hyô pơlê pơla, ôm hyô ‘na khôi túa lĕm, mâu ki kơnâ khôi túa lĕm dêi rêm hdroâng kuăn ngo châ châ xúa, chiâng mâu tíu ki rơdêi mơhnhôk tơmối troh. Jâ Trần Thị Kim Ánh, kăn pơkuâ kơpong ôm hyô a tơring Ƀuôn Đôn tối:

‘’Pakĭng mâu tơdroăng xah ƀă rui, ối tơkŭm po tơ’noăng vo plong Kazak a têa kroăng Sêrêpốk, rơtế ƀă mâu tơdroăng kơchâi kâ ki kơhiêm má môi dêi mơngế kuăn pơlê a kố, ki rơhêng vâ tối cho dêi mơngế hdroâng kuăn ngo Lếo, Rơđế ƀă M’nông, ai tơdroăng ki ai mâ tŭm má môi a cheăm Krông Na’’.

Khế 3 rơnó teăng, rơnó oăng bro têa kơdruâ, xuân cho rơnó leh hô̆i ƀă leh tơbâ hâi tơleăng lĕm, xua mê ôm hyô Dak Lak thăm kơdrâm phiu ro. Ƀă tơdroăng châ tơƀrê hluâ tơdroăng pói vâ, Leh hô̆i kơphế Ƀuôn Ma Thuột, tơleăng lĕm kong pơlê Dak Lak, hiăng kum kal khât, kum Dak Lak mơhnhôk 700 rơpâu roh tơmối ôm hyô tung Pái khế apoăng hơnăm 2025, pêi lo liăn ing ôm hyô châ 600 rơtal liăn, tâk châ péa xôh tâng pơchông ƀă roh kố hơnăm hdrối. Tiô jâ Nguyễn Thụy Phương Hiếu, Phŏ Kăn pơkuâ Khu pơkuâ ’na khôi túa lĕm, Tơ’noăng ivá ƀă Ôm hyô Dak Lak, châ tơƀrê kố ăm hlo, ôm hyô Dak Lak dế chôang ‘lâng xúa châ tơƀrê mâu tơmeăm ki ai hlâu dêi kong pơlê.

‘’Mâu khu tê mơdró pêi ôm hyô tơrŭm rơtế Khu pơkuâ ‘na khôi túa lĕm, Tơ’noăng ivá ƀă Ôm hyô tung tơdroăng mơjiâng mâu tíu troh, tung rêm tơdroăng ai hên troăng pêi vâ kum ăm hên ngế tơmối. Tơdroăng ki nếo hơnăm kố cho tơ’nôm tơdroăng tơmeăm kơnía vâ tơbleăng, nhuô̆m mâu tơmeăm a kong pơlê, kum tơmối ai tơ’nôm tơdroăng châ tâ, châ hlo. Pakĭng tơdroăng tơdjêp mâu tơdroăng ôm hyô, tơmối ối châ ti tăng plĕng tơ’nôm ‘na mâu tơmeăm ki kơnía a Dak Lak’’.

Rơnó reăng kơphế tơpo rơbông thâl rơtế mâu kong kế kân rơdâ lĕm mơnâ mâ ngăn pro tíu ki rơdêi vâ mơhnhôk tơmối ôm hyô troh ƀă Dak Lak. Mê cho xuân roh tơ’lêi vâ kong pơlê chiâng tíu troh ki má môi, tơtêk ‘na ôm hyô, kum mơdêk mơnhông cheăng kâ ƀă tơbleăng um méa kơpong tơnêi kân rơdâ troh ƀă tơmối ôm hyô tung tơnêi têa ƀă kong têa ê./.