110 ngế vâi o ki kơhnâ rơkê châ diâp ăm hlá mơ-éa mơnhên Cháu nguăn Pôa Hồ râ kong pơlê a Dak Lak cho mâu ngế pêi cheăng lĕm, hriâm rơkê, nguăn loi, mơ-eăm tơkâ luâ xơpá, ƀă cho mâu ngế rơkê hơnăm ối nếo, pơkuâ đô̆i rơkê teăng mâ ăm lối 300 rơpâu ngế đô̆i viên, vâi o tung lâp kong pơlê. Mâu vâi o hiăng kơhnâ tơ’noăng, hriâm tâp hên tơdroăng ai hên hnoăng ing mâu tơdroăng mơhnhôk, veăng ‘no ivá pro mâu tơmeăm khoăng tíu xah hêi ăm vâi o ƀă kum mâu vâi pú ki xơpá ƀă tơdroăng pêi pro kŭn tê tiô ivá tơná.

Veăng leh Cháu nguăn Pôa Hồ kong pơlê Dak Lak rôh má 11 mâu vâi o châ veăng  pêi mâu tơdroăng mê cho: lăm pôu ngăn Tíu meăn chêh inâi Nam Tiến ƀă tơbleăng hnoăng pleăng ăm Pôa; lăm pôu ngăn mâu Jâ Nôu Việt Nam khên tơnôu; trâm mâ “Vâi o Dak Lak tơrŭm môi tuăn, kơhnâ loi nguăn” a Tíu xiâm veăng gum mơnhông hnê hriâm tơrŭm ƀă mâu vâi o ki chó chêng tơvê kŏng; mơnúa ngăn vâi o ivá mo xêi, tơniăn, hriâm rơpâu tơdroăng Pôa Hồ hnê.