Pôa Tô Lâm, Kăn xiâm pơkuâ hnê ngăn Đảng pơchân tối mơdêk hnoăng ngế ối a ko tung tơdroăng pơkâ, tơbleăng mơngế pêi cheăng. Khu râ kăn pơkuâ hnê ngăn cheăng Đảng châ rah xo thế cho kăn pơkuâ kal kí, cho teăng mâ ăm khu đảng viên ƀă châ kuăn pơlê hâk vâ, loi tơngah… Mâu pơkâ dêi ngế ối a ko Đảng pơkâ hnoăng cheăng thế rah xo kăn ƀô̆ ki rơkê khât ai hiâm mơno lĕm tro; athế ai ivá tơkâ hluâ pơloăng mơnúa dêi rơxông; pêi pro châ hnoăng dêi tơnêi têa mot rơxông mơnhông mơdêk, kro mơdrŏng. Lại Hoa, Ngế chêh hlá tơbeăng ai chêh tối ‘na tơdroăng mê, pó vâi krâ nhŏng o ƀă pú hmâ kô tơmâng:

Tung ƀai chêh, pôa Tô Lâm, Kăn xiâm pơkuâ hnê ngăn Đảng tơmâng khât troh tơdroăng hbrâ mơngế veăng Hôp. ‘Na mơngế pêi cheăng râ ủy, thế tơniăn pơkuâ hnê mơhno tơdrêng, tŭm tơdroăng dêi râ ủy ƀă mâu kong pơlê, kơvâ cheăng ki kal; ngăn nhoăm ki tơƀrê, ôh tá xê xua tơdroăng rah pro rế lĕm mê chiâng kơdroh tơdroăng pơkâ, ôh tá êa kong pơlê, khu râ, kơvâ cheăng ki lâi xuân thế ai ngế veăng cheăng tung râ ủy; mơngế cheăng tung râ ủy; râ ủy viên châ rah xo thế cho mơngế ki rơkê tung tơdroăng pơkuâ cheăng kal kí, cho ngế ki teăng mâ ăm đảng viên ƀă thế cho ngế châ kuăn pơlê pâ nhoăm, rah xo; rêm râ ủy viên thế tơxâng cho ngế  tung “Khu tăng ‘nâi plĕng” tơplâ ƀă thế tơrŭm, môi tuăn dêi rơpó ‘na tuăn mơ-eăm ƀă pêi pro, thế mơngế ki tơdrăng lĕm oh tá ai tơdroăng klâi, hlối khên tơnôu. Pôa Tô Lâm, Kăn xiâm pơkuâ hnê ngăn Đảng tối nhên:    

"Thế hbrâ ƀă tơkŭm krá khât hneăng Hôp Đảng ƀô̆ rêm râ vâ troh hneăng Hôp rôh má 14 dêi Đảng, ki kal cho tăng ‘nâi plĕng hbrâ rah xo châ kơ koan mâu kăn pơkuâ dêi Đảng a rêm râ ai ivá rơdêi. Tơkŭm hbrâ mơngế râ ủy hneăng pêi cheăng ki nếo tro tiô mâu tơdroăng hiăng hnê’’.

Tung plâ pêi cheăng kăch măng Việt Nam 895 hơnăm, hdrối, ƀă 13 hneăng Hôp, Pôa Hồ ƀă Đảng pin malối tơmâng khât troh tơdroăng ‘na mơngế ki pêi cheăng. Ing rêm hneăng hôp, a tơrêm hơnăm pêi cheăng dêi kăch măng, Đảng pin hiăng mơjiâng mâu kăn ƀô̆ ai hnoăng kân veăng ‘no hlối pơkâ, pro chiâng ai tơdroăng ƀlêi trâng, pêi cheăng tơƀrê pơxúa, mơnhông djâ dêi tơnêi têa rế mơnhông tơƀrê. Xua mê, tung tơdroăng hbrâ hneăng Hôp a rêm hneăng ki lâi tơdroăng mơngế pêi cheăng xuân ngăn cho tơdroăng kân ƀă kal.

Mâu pơkâ dêi Đảng ‘na mâu tơdroăng, tơdroăng rah xo kăn ƀô̆ châ pơkâ nhên ƀa hlối hleăng. Mơhé ti mê, tơdroăng rah xo ti lâi ăm tro xuân cho tơdroăng kơ-êng ki pá. Pôa Vũ Văn Phúc, Ngế pơkuâ Khu xiâm rah chêh Hlá tơbeăng Kŏng san tối tiah kố:

"Kal thế tối tro ‘ló ƀă tro tơrêm kăn ƀô̆ vâ chêh ‘mot tung inâi hneăng Hôp rah xo cấp ủy hneăng ki nếo. Mâu kăn veăng Hôp xuân kal thế ngăn nhên vâ rah xo mâu kăn ƀô̆ ki rơkê ai tuăn chân krá tơdroăng kal kí, ai hiâm mơno lĕm tơdrăng, hên ngế nhoăm pâ, hriâm troh lâm kân, rơkê ƀeăng tung mâu tơdroăng pơcháu pêi, ai tiô pơkâ dêi tơnêi têa pơcháu pêi tung chal nếo chal mơ-eăm mơnhông tơná dêi hdroâng mơngế Việt Nam. Tơdroăng rah xo tiah lâi ăm ‘ló, ăm tơtro ƀă kăn ƀô̆ cấp ủy cho môi tơdroăng kơ-êng ki pá dế pơkâ ƀă hnoăng cheăng dêi rêm râ ƀă đảng viên cho mâu ngế teăng mâ ki Hôp hneăng hôp Đảng bô̆ rêm râ”.

Tung tơdroăng cheăng kăn ƀô̆ xuân ai tối ‘na mơdêk hnoăng cheăng dêi mơngế pơkuâ drêng tối mâu tơdroăng, mơhno mơngế vâ ăm rah xo, malối ƀă mơngế pêi cheăng pơtối pơkuâ hnê mơhno pêi pro tiô mâu pơkâ ki nếo dêi Tíu xiâm. Tơdroăng pơklât thế pêi hnoăng cheăng dêi mơngế ki vâi xo inâi vâ rah xo pro ƀăn ƀô̆ kal thế pêi pro ƀă ai ngế séa ngăn vâ châ tăng mơngế ki tơxâng cho kăn ƀô̆ ki ai hiâm mơno lĕm tuăn tơdrăng, rơkê vâ pêi cheăng tung khu kăn pơkuâ hnê rêm râ a Tíu xiâm.

Xua mê, tung môi khu pú hên, ôh tá xê têk kŏng pơtâi vâ tơbleăng xo môi ngế, mê thế ai ngế ki tối inâi vâ xo ngế ki lâi, ngế ki tối hdrối. Ngế châ vâi xo inâi vâ ăm rah xo mê, thế ai hâi khế hmâ ƀă ngế ki vâ xo inâi tơná. Vâi thế hlê nhên ki rơkê lơ ôh, ngế ki vâi xo inâi thế ai tuăn mơno lĕm tro ƀă mơngế ki vâi xo vâ rah, ôh tá xê tí tăng xo hmâng vâ, hlo pú hmâ lơ nhŏng o “tơdroăng rôe hnoăng vâ to” klêi mê, mơ’nui mơnĕn khu pú hên. Tiê̆n sih Vũ Dương Huân, Ngế pơkuâ Học viện Tơpui kâ tối: 

"Hên hneăng hdrối hiăng rah xo mâu kăn ƀô̆ kơ’nâi mê pêi cheăng ôh tá rơhéa tiô pơkâ, thăm nếo pro pá ăm dêi tơná. Ngế ki ki pin rah xo cho kal khât, rah xo thế ‘ló tro kăn ƀô̆ ki rơkê, tâng hmếo rah xo hmâng vâ kô pro tơ’nhiê tơnêi têa. Xua mê thế ‘nâi hnoăng tơná tung tơdroăng rah xo kăn ƀô̆. Mơdêk hnoăng cheăng ôh tá xê to mơngế ki mê, mê ối thá kơ koan ki rah xo hiăng hlo ai tơdroăng ki rah xo mê ôh tá tro tơdroăng pơkâ’’.

Ai khât drêng hneăng hôp, rah xo a pơkâ hdró, mơngế châ rah xo a râ ủy krúa lĕm, la drêng hiăng pêi cheăng pơxiâm tơchĕng hên xua hnoăng cheăng pêi, ki pơxúa, rơhêng vâ kâ kơhveăm.... chiâng ai tơdroăng oh tá rơhéa chiâng mơngế ‘mêi. Tơdroăng mê ăm hlo, tơdroăng rah xo ôh tá xê hlâu, kal thế pêi kơtăng, tro tơdroăng, tơbleăng tơdrăng ăm hên ngế ‘nâi; rah ngăn, rah xo mâu ngế ki rơkê hlối ai hiâm mơno lĕm,  tơdroăng veăng pêi cheăng tung râ ủy hneăng ki nếo.

Râ ủy viên ki châ rah xo mê thế cho ngế ki rơkê khât tung tơdroăng cheăng pơkuâ hnê ‘na tơdroăng kal kí, cho ngế teăng mâ ăm mâu đảng viên ƀă châ kuăn pơlê vâ pâ nhoăm, vâ rah xo. Pôa Trần Ngọc Đường, Ngế cheăng tung khu Kăn hnê ngăn Vi ƀan xiâm Măt trâ̆n tơnêi têa Việt Nam ăm ‘nâi:

"Tơdroăng pơkâ kal khât thế ‘’ai hiâm mơno lĕm‘’. Tâng ôh tá “ai hiâm mơno lĕm tơdrăng” pôi tá xo ăm pêi cheăng tung râ ủy. Pôa Tô Lâm, kăn xiâm pơkuâ hnê ngăn Đảng hiăng tối nhên ki lĕm tung rêh kâ ối, ai hiâm mơno lĕm tơdrăng tung rêh kâ ối lĕm ƀă nhŏng o hiâm mơno lĕm dêi mơngế ki châ rah xo veăng mot pêi cheăng tung cấp ủy tung hneăng ki nếo. Pakĭng mâu pơkâ ‘na thế ai hiâm mơno lĕm tơdrăng tơdroăng kal kí, tơdroăng ki rơkê, hriâm lâm kân thế kal la thế ai hiâm mơno lĕm tơdrăng khât’’.

Vâ tơkŭm po klêi hneăng Hôp rêm râ vâ troh hneăng Hôp kân mâu kăn tung lâp tơnêi têa rôh má 14 dêi Đảng, pơkâ thế tơdroăng cheăng ‘na tăng mơngế thế thế châ pêi pro tro tiô pơkâ nhên khât, tro khoa hok ƀă thế tơtro tơmot môi tuăn dêi rơpó; pối tá pro tơ ‘lêi hlâu, hmâng vâ, oh tá tro luât pơkâ, ‘nâ hiăng hiăng rah hdrối dêi ki vâ. Pakĭng mê, khŏm tah mâu ngế ki hriăn vâ tăng rôh ki vâ châ mot, rơhêng vâ pro kăn, lơ mơhnhôk mâu ngế, peăng khu, tăng ki pơxúa ăm khu, ai tuăn ôh tá lĕm, a pơlê cheăm, mâu ki hmâ,… Ai tiah mê nếo rah xo ngế ki ai hiâm mơno  lĕm tơdrăng; thế ai ngôa rơkê tuăn chân kâi tơkâ luâ tŭm tơdroăng pá pơloăng mơnúa dêi mâu rơxông; kâi pêi hnoăng cheăng pơcháu cheăng mơnhông tơnêi têa mot tung chal mơnhông tơƀrê, pro kro mơdrŏng.