A rôh pêi cheăng, mâu kăn  tối nhên ki pơxúa kal dêi tơdroăng tơkŭm po hôp. Kố cho rôh má péa po hôp tung lâp tơnêi têa ‘na tơdroăng séa ngăn dêi Kuô̆k hô̆i ƀă Vi ƀan pơkuâ cheăng Kuô̆k hô̆i   châ tơkŭm po ăm hlo ki ai tŭm tâi tâng tung tơdroăng tơbleăng séa ngăn dêi Kuô̆k hô̆i  ƀă pro pơxúa khât, veăng mơdêk ki tơ ƀrê, pơxúa séa ngăn dêi Kuô̆k hô̆i.

Tối tơbleăng a rôh hôp, pôa Vương Đình Huệ, Kăn xiâm hnê ngăn Kuô̆k hô̆i pơkâ thế Ngế chêh tôm xo rơkong dêi Kuô̆k hô̆i, Ngế pơkuâ Ƀơrô cheăng Kuô̆k hô̆i tơmâng chêh xo tŭm tâi tâng mâu tơdroăng veăng hnê tối, hbrâ tŭm nhên, pêi nhên khât tung tơdroăng tơkŭm po hôp.

Pôa Vương Đình Huệ tối nhên, hôp rôh kố thế ai peăng ki tối mâu tơdroăng hiăng pêi pro hôm tơƀrê lơ ôh tơdroăng séa ngăn hơnăm 2023, ing mê, vâ mơhno ƀai hriâm tơdroăng cheăng pêi vâ pêi châ tơƀrê tâ tung hơnăm 2024.