VOV4.Xơ Đăng - Ƀơrô hnê mơhno má môi Khu hnê mơhno Tơnêi têa ‘na hbrâ ví kong prâi pro ôh tá tơniăn nếo ai Mơ-éa thâ pơtroh Khu hnê mơhno hbrâ ví kong prâi pro ôh tá tơniăn ƀă ti tăng tŏng xo mơngế hliăng tiâ kong pơlê Lâm Đồng ‘na hbrâ ví kong mêi kân, têa lân lu kơpong têa kroăng Cam Ly.

Tiô tơbleăng ing Tíu xiâm pơtâng tối hyôh kong prâi Tơnêi têa, sap hâi lơ 20 troh hâi lơ 23/5, kơpong Tây Nguyên ai kong mêi hngêi ƀă khía pêi têi tung lâp lu, ai kong mêi kân. Vâ hbrâ pêi pro mâu troăng hbrâ ví ƀă têa lân lu rĕng đi đo a mâu kơpong têa kroăng Cam Ly, Ƀơrô má môi Khu hnê mơhno tơnêi têa ‘na hbrâ ví kong prâi pro ôh tá tơniăn, pơkâ thế Khu hnê mơhno hbrâ ví kong prâi pro ôh tá tơniăn ƀă ti tăng tŏng xo mơngế hliăng tiâ dêi kong pơlê Lâm Đồng séa ngăn krá tơniăn mâu tơdroăng tối tơbleăng kong prâi, ‘na kong mêi, têa lân lu, têa rơlêa, tơnêi tơhnah tơhnâp vâ teăm tối tơdrêng troh mâu khu râ kăn pơkuâ, kuăn pơlê, mâu tíu ôm hyô, tơmối, ki má lối cho mơngế kong têa ê, hbrâ mâu troăng ki ti tro, rak tơniăn ăm mơngế, tơmeăm khoăng.

Pơtroh khu pêi cheăng djâ troăng ahdrối hbrâ ví xía vâ xua kong prâi pro ôh tá tơniăn a mâu tíu cheăng séa ngăn mâu kơpong ki a’nâi, kơpong tơ’lêi tơhnâp a kĭng têa kroăng Cam Ly, tơkâ luâ mâu tơring Đức Trọng, tơring Lâm Hà, pơlê kong kơdrâm Đà Lạt ƀă hía hé vâ hbrâ tơkŭm po, xĕn kuăn pơlê drêng ai têa lân lu kân; kui tah trâp troăng têa, hbrâ ví tơnêi tơhnah tơhnâp.

A Sa Ly tơplôu ƀă tơbleăng