Tơnêi tíu Đà Lạt xuân châ po rơdâ kân luâ tâ hdrối ai 9 xôh tâng vâ pơchông ngăn ƀă dế nôkố. Hneăng hôp má 19 Hô̆i đong hnê ngăn kong pơlê Lâm Đồng hneăng 10 hiăng po a hâi lơ 4/10, mâu kăn hiăng têk kŏng vâ môi tuăn tơdroăng ki ‘mâi rơnêu kơphô̆ dêi pơlê kong kơdrâm Đà Lạt ƀă kơpong tâ tá troh a hơnăm 2045 ah. Tơdroăng ‘mâi rơnêu tơnêi tíu vâ po rơdâ kố cho vâ pơtối mơnhông tơdroăng rêh ối, pêi cheăng dêi kuăn pơlê tung kơphô̆ kố, kơdroh tah lôi mâu tơdroăng ki ối trâm hên pá puât, pêi pro tá hâi teăm kâi troh a xiâm ga ƀă mâu tơdroăng ki pro hâ ho ‘na troăng prôk, tah lôi tơdroăng ki kreăng tơvâ ‘na pêi cheăng kâ, tê mơdró a kơphô̆, malối a kơpong tơdế pơlê kong kơdrâm Đà Lạt.

Tiô lơgât ki chêh kơchuâ, tơnêi tíu ki châ vê hdró vâ pro kơphô̆ kố, mê cho pơlê kong kơdrâm Đà Lạt ƀă mâu tơring Lạc Dương, Đơn Dương, Đức Trọng ƀă môi pâ dêi tơring Lâm Hà ki ai tơnêi a’ngêi châ 850m tâng vâ pơchông ngăn ƀă rơgâ têa kơxĭ, tâi tâng tơnêi tíu a kơpong kố ai 336.000ha. Tung mê, kơpong ki ai tơdjâk ki vâ pro kơphô̆ xuân ai ta tơring Dam Rông. Lơgât kơchuâ um kơphô̆ kố kô chiâng hnoăng cheăng ki tơniăn ton, po troăng mơnhông ăm tơnêi tíu ki mơnhông kơpong dêi kong pơlê Lâm Đồng, ing mê, vâ khoh kâi châ mơnhông pêi cheăng kâ, rêh ối, pơlê pơla, mơhno túa lĕm tro, kơpong tơnêi tiú kơphô̆-tơmeăm khoăng ki krip lĕm dêi pơlê kong kơdrâm Đà Lạt ƀă mâu kopong tâ tá achê.

Tơdrêng amê, hnối châ xúa mâu tơmeăm khoăng ki ai xêh hlâu, loăng pơlái, kong kế, ngo ngối dêi pơlê kong kơdrâm Đà Lạt vâ mơnhông kơphô̆ thăm rế kân rơdâ, krip ro, rak vế khôi túa, vêa vong, thăm tơ’mot hên tơmối rơhêng vâ pôu ngăn, ôm hyô, rế hía rế mơnhông kơphô̆ rế kro mơdrong, hơniâp ro.