Mâu ki lo tơbriât mê klâ xoăng tơbriât a 18 tíu tâ phĭu vâ kuăn pơlê rah xo, pôk 85 ngế kăn Hô̆i đong kuăn pơlê dêi kong pơlê hneăng 13. Tung kơxô̆ ki mê mâu ngế lo tơbriât ai hên mâu kăn cheăng tung kong pơlê Gia Lai. Môi tiah pôa Phạm Anh Tuấn – Kăn hnê ngăn Vi ƀan Kuăn pơlê dêi kong pơlê, pôa Rah Lan Chung – Kăn hnê ngăn Hô̆i đong kuăn pơlê dêi kong pơlê. Inâi mê, xuân ai hên teăng mâ mâu hdroâng kuă ngo mê cho Jarai, Bơhnéa, Hre; rơtế veăng ai mâu ngế cheăng ‘na ngăn loi tĭng tiô khôp, tơniăn hên ngế, teăng mâ ăm hên khu râ Kuăn pơlê.  

Nôkố inâi 138 ngế mê hiăng chêh tơbleăng tro tiô pơkâ. Nôkố tơdroăng hbrâ tâ phĭu a Gia Lai dế châ tơbleăng, tro tiô tơdroăng. Lap tung kong pơlê ai 2.179 kơpong tâ phĭu, ăm lối 2 rơtuh 580 rơpâu ngế kuăn pơlê lăm tâ.