VOV4.Xơ Đăng - Pơxiâm po a kơxo lơ 7/7, a pơlê kong kơdrâm Kon Tum ƀă po tung pơla 2 hâi, Hneăng hôp má 3, Hô̆i đong hnê ngăn kong pơlê Kon Tum hneăng 12 ƀă hên tơdroăng ki kal châ kuăn pơlê tung kong pơlê tơmâng ngăn châ mâu kăn tơkŭm tơpui tơno, tiâ mơnhên ƀă pơkâ mâu tơdroăng ối tung hnoăng pơkuâ. Tối tơbleăng ‘na tơdroăng cheăng kâ rêh ối pơlê pơla 6 khế apoăng dêi Vi ƀan hnê ngăn kong pơlê Kon Tum a hneăng hôp kố ăm hlo, maluâ tâi tâng kế tơmeăm a kong pơlê tâk 9,69%, hên tâ kơlo tâk rơtế ƀă khế kố hơnăm hdrối, la hên tơdroăng pơkâ ôh tá tơdâng tơ’mô ki hên cho ôh tá châ ƀă tơdroăng ki loi tơngah.

Mâu kăn veăng a hneăng hôp má 3, Hô̆i đong hnê ngăn kong pơlê Kon Tum hneăng 12

Rơtế amê hên tơdroăng ki tá hâi teăm pơkâ tơleăng, tá hâi teăm pơkâ tơleăng tơdrêng cho tơdroăng ki pro pá dêi tơdroăng mơnhông pêt mơjiâng, môi tiah: pêt kế tơmeăm tung chiâk deăng ôh tá hlo tơƀrê; pơreăng xông kâ ‘nhiê a Sâm Ngọc Linh pro chiâng tro lŭp ăm mâu rơpŏng kuăn pơlê ki pêt; tơdroăng ki hơ’lêh chêh pro hlá mơ-éa, hơ’lêh tơdroăng ki ‘no liăn cheăng, tê mơdró, mơdêk ivá tơxup tơbriât dêi kong pơlê ối iâ.

Drêng tung rôh pơchuât pơxiâm po rôh hôp, pôa Dương Văn Trang, ngế cheăng tung tíu xiâm Đảng, kăn pơkuâ hnê ngăn Đảng, Kăn hnê ngăn Hô̆i đong hnê ngăn kong pơlê Kon Tum pơkâ thế mâu kăn tơkŭm tuăn ngoâ rơkê, pơkâ mơ’no mâu troăng hơlâ pôi tá ăm mâu tơdroăng ki ôh tá tơƀrê ki ‘ro athế rĕng pơkâ tơleăng.

A hneăng hôp má 3, Hô̆i đong hnê ngăn kong pơlê Kon Tum hneăng 12, kuăn pơlê kong pơlê Kon Tum tơngah a khu kăn pơkuâ, mâu kơ koan ki ai tơdjâk kô ai rơkong tiâ mơnhên tơtro ƀă hên tơdroăng ki kal, ki ối trâm, ki ối hêng hôu a rôh kơ-êng, tiâ mơnhên môi tiah tơdroăng ki tơnêi tơtro a tơring Kon Plông; tơdroăng ki ôh tá ai tơnêi ối, tơnêi pêi kâ dêi kuăn pơlê kơpong ki tơnêi tơhnah; hrá kĭ pơkâ mâu hlá mơ-éa, túa pơkâ xúa tơnêi râ tơring; tơdroăng ki ‘no kơxô̆ liăn ƀaoh hiêm khăm pơlât ki ôh tá tro ăm chêl, ‘no liăn, xo tơvêh; tơdroăng ki mâu ƀok thái pơkeăng pâ pơ’lêh lơ pơtê cheăng ƀă hên ki ê.

Katarina Nga tơplôu ƀă tơbleăng