Tơdroăng tơbâ, trâm mâ tơpui tơno ƀă mâu mô đô̆i rong râ ó tung lâp tơnêi têa dó inâi ‘’On ing plâi nuih’’, veăng amê ai 100 kăn teăng mâ cho mô đô̆i rong râ ó, 50 kăn ƀô̆, ƀok thái pơkeăng troh ing 14 tíu xiâm păn roăng, pơlât mô đô̆i rong râ lâp tơnêi têa ƀă vâ chê 600 ngế droh rơtăm, sinh viên tung pơlê kong xiâm Hà Nội.

Mâu kăn teăng mâ châ tơmâng mâu mô đô̆i rong râ trâm mâ, tối ‘na mâu tơdroăng ki pleăng, hía ƀă pleăng hnoăng ki mâu mô đô̆i rong râ hiăng trâm. Ing rơkong hơ’muăn dêi vâi, tơdroăng rêh ối tơplâ, mâu hnoăng cheăng ƀă mâu tơdroăng ki hía, châi rong châ vêh mơhno vâ rêm ngế ki ngăn, ki rơhêng vâ tối cho mâu sinh viên hlo roh tơplâ khên tơnôu, khŏm tơplâ xuân môi tiah hnoăng dêi mâu mô đô̆i rong râ tối krê ƀă rơxông prôk hdrối.

O Lê Thảo Đan, sinh viên Hngêi trung Đăi hok Kinh Tế Kuô̆k yân tối:

“Drêng châ veăng tơdroăng, châ tơmâng mâu meh mô đô̆i rong râ tối ‘na môi rơxông tơplâ xâ nah, á tâ tơdroăng ki pleăng chhá mơheăm kân kĭn dêi mâu meh, pleăng dêi rơxông ối nếo dêi tơná vâ ăm ngin o châ rêh ối môi tiah hâi kố. Á o kô mơ-eăm hriâm tâp vâ veăng kum djâ tơnêi têa mơnhông mơdêk tâ, tơxâng ƀă mâu tơdroăng ki pleăng dêi rơxông pôa pâ’’.

 Pêi pro troh tơbâ 69 hơnăm Hâi Tơleăng lĕm Pơlê kong xiâm. Khu ngăn vâi kơdrâi Pơlê kong kân Hà Nội hiăng tơkŭm po Hâi mơdĭng “Vâi kơdrâi Pơlê kong xiâm pơxiâm pêi cheăng tơmiât rơkê” hơnăm 2023. Hâi mơdĭng cho rôh vâ mơhnhôk hiâm mơno pơxiâm pêi cheăng ƀă hơ’lêh nếo tơdroăng tơchĕng tơmiât dêi vâi kơdrâi pơlê kong kân Hà Nội, bro tơ’lêi ăm mâu khu pơkuâ ngăn, khu mơdró kâ ƀă mâu khu tơrŭm tŏng kum pơxiâm pêi cheăng trâm mâ, tơpui tơno ăm dêi mâu tơdroăng ki hlê plĕng, hriâm ƀối ing dêi rơpó ƀă tơdjêp, tơrŭm mơnhông mơdêk. Khu ngăn vâi kơdrâi pơlê kong kân Hà Nội hiăng pơ-ôu pơ-eăng 10 tơdroăng tơmiât, kế tơmeăm bro ki rơkê.

Xuân a hâi po mơdĭng, mâu nâ hiăng hlê plĕng pế pơchên mâu kế kâ sap ing kế tơmeăm dêi kong pơlê. Nâ Phạm Thị Tư Hậu, Ngế ki pơkuâ tíu mơjiâng bro kế kâ Yến Anh Food ăm ‘nâi:

“Ba Vì cho pơlê xiâm á cho kơpong ƀăng tơnêi ngo mâu kuăn pơlê pơ’lêh pêt hên pôm loăng la ôh ti ai tíu tê. Tê ăm khu ki roê mê hmâ tro hjip yă mê á hiăng tơmiât bro 10 túa kế kâ ki ai tơdjâk troh pôm loăng, môi tiah: kơƀăn pôm loăng ki pôh ƀă têa plâi tuâk, kơƀăn pôm loăng poh pho mai, kơƀăn pôm loăng pôh sầu riêng, pôm loăng âp ƀă hlá ki xú hŏm, pôm loăng hơ’lâk ƀă kơphế ƀă hên kế kâ ki ê tíu pro kố ối tê ăm mâu tíu tê ki ê tung lâp tơnêi têa ƀă mâu kong têa pú môi tiah Lếo, Kul”.

Koh phiu ro leh tơbâ 69 hơnăm Hâi tơleăng lĕm Pơlê kong xiâm, a Hà Nội hiăng tơkŭm po mơđah tơbleăng Um kơchuâ ƀă dó inâi ‘’Mâu pơkâ tơniăn pơlê pơla, pôu râng hnoăng cheăng, lo pêi, tơmiât pêi rơkê, mơnhông’’. Mơđah tơbleăng hơnăm kố mơđah tơbleăng 260 tơdroăng ki pro tung mâu tơmeăm: Kơchuâ, chêh kơchuâ ƀă pong rơgi, châ Hô̆i đong ngê̆ thuât rah xo ing lối 365 tơdroăng ki pro dêi mâu ngế kơchuâ pro.

Tung mê, ai 229 tơdroăng ki pro, chêh kơchuâ ƀă 31 tơmeăm pong rơgi. Tiô mơnhên dêi mâu ngế kơchuâ rơkê, ki lĕm eăng dêi mơđah tơbleăng um pơlê kong xiâm hơnăm kố cho tơdroăng ki rơkê rế hôm. Mê cho troăng mơhno mâu tơdroăng ki pro rơkê ƀă tơdroăng mơ’no tuăn ngôa kơtăng dêi mâu ngế ki kơchuâ pro.

Mơđah tơbleăng po roh tơ’lêi trâm mâ pơla mâu ngế kơchuâ. Kố xuân cho roh vâ khu ngế kơchuâ um pơlê kong xiâm rơtế tơdjêp, tơmiât troh pơkâ mơnhông ó rơdêi xua mê um kơchuâ pơlê kong xiâm tung la ngiâ. Ngế pong rơgi tơmeăm Nguyễn Xuân Thủy – Kăn hnê ngăn Hô̆i Mih thuât Hà Nội tối ăm ‘nâi:

"Mơdah tơbleăng kố ai ki má môi cho kheăn kơdeăn kuăn mơngế Hà Nội, kong kế ƀă khôi túa lĕm tro Hà Nội. Ing mơđah tơbleăng kố, mâu ngê̆ sih pói vâ pơtroh ngế ki hâk vâ ngê̆ thuât pơlê kong xiâm pơtâng hnê tối cho Ngê̆ thuât Hà Nội đi đo mơnhông, mâu tơdroăng tơpui đi đo châ mơhnhôk xuân môi tiah châ rak pêi tiô ton ƀă mơnhông mâu khôi túa lĕm tro dêi mơngế Hà Nội, khôi túa mơjiâng ƀă gâk kring pơlê kong xiâm xuân môi tiah khôi túa lĕm mơngế Hà Nội tối tơdjuôm’’.