Klêi kơ’nâi vâ chê 1 khế veăng lâm hnê klê têa tê kơtê châ po a cheăm, hên hok tro a 2 cheăm Čư̆ Mgar, kong pơlê Dak Lak hiăng chiâng klê têa ƀă ‘nâi hbrâ ví drêng trâm klâk têa. O H’Niêm Niê, a ƀuôn Kna Ƀ, cheăm Čư̆ Mgar tối:

“Á kuăn ƀă mâu pú hmâ chiâng klê têa ƀă ngin kuăn hâk vâ hriâm klê têa vâ hbrâ ví klâk têa drêng prôk tơkâ têa kroăng, têa plông. Lâm hriâm kố kum ngin kuăn chiâng klê ƀă hbrâ ví klâk têa’’

O Phan Hoàng Quý Phước, ối a cheăm Quảng Hiệp, tơring Čư̆ Mgar hơ’muăn:

“Hngêi á kuăn ối a hơngế vâ prôk lăm a tíu ki ê vâ hriâm klê têa ôh tá tơ’lêi hlâu. Mâu xăng tăm hiăng djâ tíu klê têa a kố, kơnôm mê á kuăn hiăng chiâng klê têa ƀă ôh tá xâu têa môi tiah nah xếo’’.

Mâu lâm hnê klê têa tê kơtê a 2 cheăm Čư̆ Mgar ƀă Quảng Hiệp dó inâi ‘’Tíu klê têa ki chiâng djâ utâi utá troh a pơlê’’ cho tơdroăng pêi xua Kâu lăk ƀô̆ xua vâi o hâk vâ tơring Čư̆ Mgar tơrŭm ƀă mâu tíu cheăng ƀă khu tŏng kum mơngế pá puât pêi pro tung rơnó pơtê hriâm hơnăm kố. Tơdroăng kố hiăng châ tơdah tơdroăng tŏng kum, rơtế dêi hên thái cô tung rơnó pơtê hriâm hơnăm kố.

Tơdroăng pêi cheăng kố hiăng châ tơdah tơdroăng tŏng kum, rơtế dêi hên mâu thái cô ƀă kuăn pơlê tung cheăm. Ngoh Hà Mạnh Tuấn, thái hngêi trung râ má péa Ngô Mây, cheăm Ea MDroh tối:

“Tơrŭm ƀă thái Chuyền hnê klê têa ăm mâu muăn tung roh pơtê hriâm vâ mâu muăn a cheăm pin châ hriâm tê kơtê’’.

Jâ Hồ Thị Nhâm a cheăm Čư̆ Mgar, Dak Lak tối tơdroăng phiu ro drêng veăng tŏng kum mâu muăn châ hriâm klê têa:

“Á tŏng kum plông, tŏng kum liăn on tơhrik ăm mâu vâi muăn vâ kum mâu muăn ai tíu hriâm, tâ hlo kum pơxúa klêi mê á kum’’.

Ngoh Mai Văn Chuyền, thái hngêi trung râ má péa Ngô Mây, Pơkuâ Kâu lăn ƀô̆ xua vâi o hâk vâ tơring Čư̆ Mgar tối ăm ‘nâi, tô tuăn ƀă tơdroăng hên vâi hdrêng a cheăm kơpong hơngế hơngo tro klâk têa, tung 3 hơnăm hiăng hluâ, Kâu lăk ƀô̆ hiăng thăm krếo thế pơlê pơla, mâu ngế tŏng kum mơngế pá puât rơtế tŏng kum kơxô̆ liăn vâ pro tíu klê ki chiâng djâ utâi utá ƀă po mâu lâm hnê klê têa tê kơtê troh a mâu cheăm.

Troh nôkố, Kâu lăk ƀô hiăng hbrâ châ 3 tíu klê têa a 2 tơring Čư̆ Mgar ƀă Krông Bông. Mot a roh pơtê hriâm, tíu klê têa ki chiâng djâ utâi utá châ djâ troh mâu cheăm vâ tơkŭm po ăm mâu vâi o hriâm klê têa. Tung 3 hơnăm hiăng hluâ, hiăng ai vâ chê 600 ngế vâi o châ hriâm klê têa tê kơtê tung rơnó pơtê hriâm.

Rơtế a mê, drêng mot hơnăm hriâm, Kâu lăk ƀô̆ tơrŭm ƀă mâu hngêi trung tơkŭm po mâu lâm hnê pơtâp, hnê mơhno hok tro tung tơdroăng hbrâ mơdât klâk têa. Xuân tiô ngoh Mai Văn Chuyên, nôkố Kâu lăk ƀô̆ dế pơtối po rơdâ mơngế ƀă cheăm hnê mơhno, tơdjêp tơkŭm po hnê mơhno ăm thái cô, pơkuâ tâi tâng khu a mâu hngêi trung hriâm vâ vâi ‘nâi tơ’nôm tơdroăng klê têa, hbrâ tâ tung tơdroăng pơtâng tối, hnê mơhno  hok tro.

Tơdrêng amê, Kâu lăk ƀô̆ pơtối mơhnhôk khu râ vâ diâp ăm mâu troăng pêi, tơmeăm xúa tung tơdroăng hnê mơhno a mâu hngêi trung.

“Xuân pói vâ kum mâu vâi o ‘nâi tơ’nôm mâu troăng vâ hbrâ ví klâk têa châ tơƀrê. Á xuân pói vâ tung la ngiâ khu râ kăn pơkuâ, mâu râ cheăng, mâu nôu pâ hok tro kô tơmâng hên tâ troh tơdroăng hbrâ ví trâm xía vâ, ví klâk têa ăm mâu vâi o, ƀă pói vâ kô ai hên tâ nếo tơdroăng tơdjuôm ivá dêi mâu khu tê mơdró, khu pú hên, mâu ngế tŏng kum mơngế pá puât, ki rơhêng vâ tối cho kơvâ Đoân, Khu pơkuâ ngăn vâi kơdrâi... a pơlê cheăm vâi kô chiâng tơkŭm po mâu lâm hnê klê têa ăm mâu vâi o a mâu cheăm kơpong hơngế hơngo’’.

Kong pơlê Dak Lak pơkâ hnoăng cheăng troh a hơnăm 2025 tâi tâng vâi hdrêng hriâm râ má môi, râ má péa châ hriâm ‘na tơdroăng xía vâ, châi rong; 50% chiâng rak dêi tơná tơniăn tung têa. Vâ châ pơkâ kố, tơdroăng tơdjuôm ivá, veăng mơ’no ivá dêi mâu ngế krê, khu pú hên ƀă mâu ngế tŏng kum mơngế pá puât tung tơdroăng po lâm hnê klê têa cho kal khât. Ki rơhêng vâ tối ƀă mâu pơlê cheăm kơpong hơngế hơngo, kơpong pá puât, mâu lâm hnê klê têa tê kơtê kô kum ăm hên vâi o ối kŭn ai roh châ achê, hriâm tơdroăng tơniăn hbrâ ví klâk têa.