Tơbleăng a hneăng hôp, kăn teăng mâ mâu kong pơlê Gia Lai, Kon Tum, Dak Nông, Dak Lak, Bình Phước hiăng ai mâu tơdroăng pâ thế khât, vâ mơdêk trâm mâ mơnhông cheăng kâ, rêh ối pơla mâu kong pơlê ai tíu tơkăng kong.

Peăng Gia Lai, Vi ƀan kong pơlê pơkâ thế Kuô̆k hô̆i pái kong têa ai luât pơkâ krê tơ’lêi hlâu ăm kơpong pái to kong têa mơnhông  tơƀrê môi tiah luât pơkâ ‘no liăn pro hnoăng mơhá kơdroh, luât pơkâ mơnhôk tăng liăn, mơnhông pêi mâu tơdroăng tơkêa pro ‘na khăm pơlât pơla péa tơnêi têa.

Mơgêi hâi pêi cheăng pôa Vũ Hải Hà, Ngế cheăng tung kăn xiâm Đảng, Ngế pơkuâ Vi ƀan Tơpui kâ dêi Kuô̆k hô̆i tơnêi têa pin ăm ‘nâi: Mâu tơdroăng veăng hnê tối ai pơxúa kal vâ Kuô̆k hô̆i pái  tơnêi têa kum Chin phuh 3 tơnêi têa pơtối rơtế ƀă mơdêk mơ’no luât cheăng ăm kơpong, kring vế tơniăn lĕm, mơjiâng tíu tơkăng kong hơniâp, tơrŭm tơroâ ƀă mơnhông mơdêk, vâ tơdroăng tơrŭm  pơla pá tơnêi têa rế tơniăn lĕm.