Tiô tối tơbleăng, hơnăm 2022, ƀă 9 khế hơnăm 2023, tâi tâng kơxô̆ liăn mơhnhôk pê lo dêi 15 to kong pơlê kơpong Tơdế tơnêi têa - Tây Nguyên ai 115 rơtal liăn. Tung mê , kơxô̆ liăn mơhnhôk cheăng dêi râ tơnêi têa xing xoăng ăm mâu kong pơlê ai lối 56 rơtal liăn, ki u ối cho liăn kong pơlê.

Tiô khu xiâm ngăn tê mơdró kong pơlê, Khu ngăn tê mơdró tối tơdroăng mơhnhôk cheăng dêi 15 to kong pơlê kopong Tây Nguyên châ tơbleăng hên túa, tí tăng ki tơ’lêi hlâu tơbriât cheăng dêi kong pơlê ƀă tung lâp kơpong tung mâu khế mơ’nui hơnăm 2023, mâu kong pơlê kal tơkŭm pê a mâu tơdroăng cheăng ki kal, mê cho: tí tăng ngăn, hnê mơhnhôk pêi mâu tơdroăng tơkêa pro mơhnhôk pêi cheăng tro hâi khế pơkâ, mơdêk hnê mơhno, lăm ngăn, tí tăng ngăn vâ teăm tah ki xơpá tơvâ tơvân tung pơla tơbleăng pêi mâu tơdroăng tơkêa.