Tiô tơbleăng mơgêi pêi pro Pơkâ 18, kong pơlê Dak Lak hiăng pêi pro hên troăng pêi, môi tiah tơdroăng tơdjêp inâi Kăn pơkuâ Mơhnhôk kuăn pơlê ƀă Kăn hnê ngăn Vi ƀan Măt trâ̆n Tơnêi têa kong pơlê, pro chiâng môi Đảng ƀô̆ Khô̆i mâu kơ koan ƀă Đảng ƀô̆ Khô̆i mâu khu tê mơdró kong pơlê. Kong pơlê hiăng kơdroh 10% ƀiên chê̆ tâng pơchông ƀă hơnăm 2015, kơdroh 30 kơbong, kơ koan xiâm ối tung mâu khu, tơdrêng amê kơdroh 40 kơbong ƀă mâu tíu cheăng ki tơdâng ối tung mâu kơ koan xiâm.

Tung la ngiâ, Dak Lak pơtối pêi pro mâu troăng pro chiâng môi, tơmot mâu khu cheăng, kơvâ cheăng, vâ kơdroh ki xiâm ƀă mơdêk châ tơƀrê pơkuâ. Pôa Nguyễn Đình Trung, Kăn pơkuâ hnê ngăn cheăng Đảng kong pơlê tối nhên, tơdroăng bro lế lĕm tro khu pêi cheăng kal thế tơniăn tiô khoa hok, tơtro ƀă tơdroăng nôkố, tơdrêng amê ƀă tơdroăng mơdêk ki dâi lĕm tơdroăng cheăng kăn ƀô̆.