VOV4.Xơ Đăng -  Hâi lơ 14/4, Khu pơkuâ Đảng ƀô̆ kong pơlê Gia Lai tơkŭm po Hneăng hôp roh má tơpah (po rơdâ). Tiô mơnhên a hneăng hôp, tơdroăng cheăng kâ – rêh ối pơlê pơla pái khế apoăng hơnăm 2022 a kong pơlê Gia Lai ai pro tơniăn, mơnhông mơdêk. Ki nhên, kơlo tơtêk tâi tâng tơmeăm GRDP tiô tối hdrối châ lối 7%, pêi lo liăn ngân tơnêi têa châ 1.660 rơtal liăn, pêi lo liăn tê tơmeăm ngi kong têa ê pái khế apoăng hơnăm châ 200 rơtuh dolar, tâk 25% tâng pơchông ƀă roh kố hơnăm nah. Mâu tơdroăng ki mơhno ‘na tâi tâng ki kơnâ mơjiâng kơmăi kơmok, tê ‘ngé tơmeăm pơrá tâk tâng pơchông ƀă roh kố hơnăm nah.

Tâi tâng hneăng hôp Khu pơkuâ Đảng ƀô̆ kong pơlê Gia Lai roh má 7

Hneăng hôp môi tuăn, tung la ngiâ, kong pơlê tơkŭm pêi pro mâu troăng pro tơ’lêi hlâu vâ pro tơniăn, mơnhông mơdêk cheăng kâ, tơniăn tơdroăng rêh ối pơlê pơla; kơtăng pro tơniăn pêi chiâk deăng tiô troăng pơhlêh hdrê pêt, xúa kơmăi kơmok rơxông nếo; thăm mơjiâng thôn pơlê nếo tiô troăng prôk trâu hơhngế, châ tơƀrê; thăm pơkuâ tơnêi tơníu; thăm mơnhông kơmăi kơmok, tŏng kum khu tê mơdró thăm rĕng mơ’no liăn cheăng; pơhlêh pro mơ-éa.

A Sa Ly tơplôu ƀă tơbleăng