A hneăng hôp Khu râ kăn xiâm ASEAN+3 roh má 26, rêm pâ vêh mơnhên ki kal dêi tơrŭm cheăng ASEAN+3 ƀă hơniâp lĕm, tơniăn, tơrŭm ƀă mơnhông mơdêk. Khu râ kăn pơkuâ ASEAN + 3 môi tuăn tơrŭm pêi pro châ tơƀrê Pơkâ pêi tơrŭm cheăng ASEAN+3 hneăng hơnăm 2023 – 2027, tung mê, mơnhông ki rơdêi ‘na cheăng kâ, tê mơdró, liăn ngân, khăm pơlât ƀă hía hé ƀă po rơdâ mâu kơvâ tơrŭm cheăng nếo, tơkŭm pơ’lêh nếo tơmiât pêi rơkê, tơniăn bê kế kâ, pơ’lêh xúa on tơhrik, kong prâi pro ôh tá tơniăn,... tơmiât troh la ngiâ pêi tŭm tâi tâng ƀă krá tơniăn.

Pôa Phạm Minh Chính, Ngế pro xiâm hnê ngăn tơnêi têa tối pói vâ ASEAN+3 kô ai hnoăng tơtro, châ tơƀrê tung pơkâ mâu troăng pêi ki chiâng pêi pro, rơtế dêi pó tơkâ hluâ mâu tơdroăng pá puât, pơloăng mơnúa nôkố.

A Hneăng hôp Khu râ kăn xiâm ASEAN – Mih roh má 11, jâ Kamala Harris, Kăn xiâm phŏ pơkuâ kong têa Mih tơkêa rơdêi ƀă ton xŏn ƀă ASEAN ƀă kơpong, môi tuăn ASEAN ai hnoăng tíu xiâm, tối rơdêi péa pâ kum ăm dêi pó ki pơxúa, kơjo ƀă tơmiât pêi ton xŏn, hbrâ mơdât pơloăng mơnúa tơdjuôm. A hneăng hôp Khu râ kăn xiâm ASEAN – Canada, rêm pâ xuân hiăng môi tuăn tơbleăng ăm pêi pro Tơbleăng tơdjuôm păng ‘nâng mơjiâng tơrŭm cheăng ton xŏn ASEAN – Canada.

Hâi lơ 7/9/2023, Khu râ kăn pơkuâ mâu kong têa  veăng Hneăng hôp Khu râ kăn xiâm ASEAN ƀă Ấn Độ ƀă Hneăng hôp Khu râ kăn xiâm peăng mâ hâi lo châu Á (EAS).

Pakĭng Hneăng hôp, tung hâi lơ 6/9, pôa Phạm Minh Chính hiăng trâm mâ Ngế pro xiâm hnê ngăn kong têa Canada cho pôa Justin Trudeau; pôa Kishida Fumio, Ngế pro xiâm hnê ngăn kong têa Nhuk, trâm mâ tơpui tơno ƀă pôa Yoon Suk-yeol, Kăn xiâm pơkuâ kong têa Hàn Quốc ƀă pôa Lý Cường, Ngế pro xiâm hnê ngăn têa Sinuâ.