VOV4.Xơ Đăng - Kơxo lơ 25/4, a Tíu pêi cheăng Chin phuh, Khu hnê mơhno Tơnêi têa ‘na hbrâ ví kong prâi pro ôh tá tơniăn tơrŭm ƀă Vi ƀan Tơnêi têa Hbrâ ví kong prâi pro ôh tá tơniăn ƀă ti tăng tŏng xo mơngế hliăng tiâ tơkŭm po Hneăng hôp lâp tơnêi têa ‘na hbrâ ví kong prâi pro ôh tá tơniăn ƀă ti tăng tŏng xo mơngế hliăng tiâ hơnăm 2022.

Hneăng hôp lâp tơnêi têa ‘na hbrâ ví kong prâi pro ôh tá tơniăn ƀă ti tăng tŏng xo mơngế hliăng tiâ hơnăm 2022

Pôa Lê Văn Thành, Ngế pro xiâm phŏ hnê ngăn tơnêi têa, Kăn pơkuâ hnê mơhno Tơnêi têa pơkuâ hneăng hôp. Xông tơpui pơxiâm po Hneăng hôp, pôa Lê Minh Hoan, Ngế xiâm pơkuâ ‘na pêi chiâk deăng ƀă mơnhông thôn pơlê, Kăn xiâm phŏ hnê mơhno má môi tối ăm ‘nâi, hơnăm 2021, mơhé mâu kong têa tung lâp plâi tơnêi hiăng mơ-eăm hên hbrâ ví kong prâi pro ôh tá tơniăn laga kong prâi hiăng pro ôh tá tơniăn pro 16 rơpâu ngế hlâ, hía, tâi tâng tro lu\p ‘na cheăng kâ lối 340 rơtal dollars ƀă tơdjâk troh tŭm tơdroăng rêh ối, cheăng kâ – pơlê pơla dêi hên kong têa kơpong.

Tiô mơnhên dêi Tíu xiâm Tối pơtâng kong prâi Tơnêi têa, hơnăm 2022 mơni kô ai kong mêi khía mơhot têi ƀă dâng 10 – 12 roh kong mêi khía mơt têi a kơpong têa kơxĭ Biển Đông. Ing kong prâi pro ôh tá tơniăn sap apoăng hơnăm troh nôkố, kô hlo, kong prâi pro ôh tá tơniăn hơnăm 2022 kô pơtối pro râ ƀă phá tơ-ê.

A Sa Ly tơplôu ƀă tơbleăng