Rơtế ƀă mâu hlá mơ-éa pơchuât tơbleăng dêi Khu pơkuâ ngăn Hô̆i đong hnê ngăn kong pơlê Kon Tum, mâu khu Hô̆i đong hnê ngăn kong pơlê, Hngêi tơleăng Kuăn pơlê, Viê̆n séa ngăn arak luât Kuăn pơlê, Khu Pêi pro tơdroăng xôi kuăn pơlê kong pơlê ƀă hên ki ê, Vi ƀan hnê ngăn kong pơlê Kon Tum kô pơtroh 52 tơdroăng ki kal.

Tung mê, kuăn pơlê vâ ‘nâi plĕng hên troh tơdroăng pơchuât tơbleăng ‘na cheăng kâ rêh ối pơlê pơla hơnăm 2024. Hên tơdroăng ki vâ pêi mơnhông cheăng kâ rêh ối pơlê pơla dêi kong pơlê ôh tá châ tiô pơkâ mơ’no, ‘no liăn pêi cheăng tơdjuôm hrá; nâp liăn tơnêi têa tiô pêi pro dâng 4.425 rơtal, bu châ lối 96% pơkâ Hô̆i đong hnê ngăn kong pơlê pơcháu; kơxô̆ kơdroh kơtiê, băng tơnêi pêi kâ hên túa hdrê pêt ôh tá châ tiô pơkâ. Rơtế amê kuăn pơlê Kon Tum xuân tơmâng ngăn troh tơdroăng ki pêi pro kơdĭng, mơdât tơdroăng hrê hmâng vâ; tơdroăng pơkuâ, xúa tơmeăm tơdjuôm; klêi kơ’nâi pêi pro hnoăng cheăng hdroâng kuăn ngo.