Kố cho tơdroăng ki tơbleăng a rôh hôp tơbleăng xua Vi ƀan xiâm Măt trâ̆n Tơnêi têa Việt Nam tơkŭm po a kơxo lơ 4/10. Hlá mơ-éa Hneăng hôp khu kăn lâp tơnêi têa Măt trâ̆n Tơnêi têa Việt Nam rôh 10 châ chêh pro tung tơdroăng ki séa ngăn mâu troăng hơlâ nếo dêi Đảng, mơgêi, mơnhên tối nhên tơdroăng cheăng Măt trâ̆n ing kong pơlê, xo mâu rơkong tơpui ing mâu kơvâ cheăng, mâu khu tơrŭm mâu ngế cheăng ƀă rêm râ kuăn pơlê ƀă ai mâu tơdroăng pơhlêh tơƀrê.

‘Na tơdroăng tơkêa mâu ngế pêi cheăng pơtroh ăm Hneăng hôp, tiô tối hdrối kơxô̆ ngế cheăng tung Vi ƀan xiâm Măt trâ̆n Tơnêi têa Việt Nam hneăng 10 cho: 405 ngế (tâk 20 ngế tâng pơchông ƀă hneăng 9). Tung mê, vêh cheăng cho 249 ngế (kơxô̆ châ 61,5%), nếo cho 156 ngế (kơxô̆ ngế châ 38,5%). Hneăng hôp xuân ‘mâi rơnêu, ‘mot tơ’nôm Tơdroăng pơkâ dêi Măt trâ̆n Tơnêi têa Việt Nam, tung mê ai tá tơdroăng ki pêi pro nhên hnoăng cheăng, hnoăng pơkuâ dêi Khu kăn hnê ngăn ‘na tơbleăng mâu rôh mơhnhôk, mâu tơdroăng tơ’noăng pâ nhuô̆m tơnêi têa tơxâng ƀă tơdroăng dêi tâi tâng kuăn pơlê, tŭm têk.