VOV4.Xơ Đăng - Kơxo lơ 7/6, a Pơlê kong kơdrâm Ƀuôn Ma Thuột, Khu pơkuâ mô đô̆i hneăng hdrối nah Việt Nam tơkŭm po Hneăng hôp tơpui tơno Khu pơkuâ mô đô̆i hneăng hdrối nah veăng gâk kring kong prâi, veăng amê ai mâu kăn teăng mâ mâu Khu pơkuâ mô đô̆i hneăng hdrối nah 14 kong pơlê, pơlê kong kơdrâm kơpong peăng Tơdế Tơnêi têa – Tây Nguyên.

Tiô Khu pơkuâ mô đô̆i hneăng hdrối Việt Nam, sap hơnăm 2006, Khu rơtế Khu xiâm pơkuâ loăng pơlái kong kế hiăng kĭ tơkêa mâu tơdroăng tơrŭm pêi pro tơdroăng rak vế kong prâi ƀă pơkuâ tơnêi tơníu. Troh nôkố, mâu khu râ hiăng mơjiâng châ 1.650 troăng pêi kâu lăk ƀô̆ mô đô̆i hneăng hdrối nah veăng rak vế kong prâi.

Tâi tâng hneăng hôp tơpui tơno

Mâu kâu lăk ƀô̆ nếo ai mâu tơdroăng pêi tơdrêng veăng rak vế kong prâi, pêi pro mâu tơdroăng gâk ngăn kong prâi, rế mơhnhôk, pơtâng tối ‘na tơdroăng pêi cheăng kố. Hên tôh pơtâng tối gâk ngăn kong prâi râ cheăm hiăng châ Khu pơkuâ mô đô̆i hneăng hdrối nah mơjiâng ƀă pêi cheăng châ tơƀrê.

A hneăng hôp tơpui tơno, mâu kăn teăng mâ rơtế tơpui tơno, tối ăm dêi pó mâu tơdroăng xiâm tung tơdroăng mô đô̆i hneăng hdrối nah veăng rak vế kong prâi, túa pêi ki rơkê tung tơdroăng pơtâng tối, mơhnhôk kuăn pơlê; mơdêk hlê plĕng, ivá pêi cheăng ăm khu mô đô̆i hneăng hdrối nah, mơnhông hnoăng ki xiâm tung rak vế kong prâi.

A Sa Ly tơplôu ƀă tơbleăng