Kố cho hneăng hôp mơ’nui hơnăm vâ séa ngăn, mơnhên tối tơdroăng pêi pro pơkâ dêi Hô̆i đong hnê ngăn kong pơlê ‘na hnoăng cheăng mơnhông cheăng kâ rêh ối pơlê pơla hơnăm 2023, pơkâ mơ’no hnoăng cheăng, troăng hơlâ pêi pro hơnăm 2024 ƀă ăm rơkong tơpui tối hên tơdroăng, tơdroăng tơkêa ki kal dêi kong pơlê. Tiô tối hdrối hneăng hôp po tung 3 hâi.

A hneăng hôp kố, Hô̆i đong hnê ngăn kong pơlê Dak Lak séa ngăn mâu hlá mơ-éa pơchuât tơbleăng ‘na hnoăng cheăng hbrâ mơdât mâu ngế pro xôi ƀă pro xôi luât a kong pơlê, hnoăng cheăng hbrâ mơdât kâ kơluâ, tơleăng mâu tơdroăng ki pơsăm tối pơsăm tơkêng, hmâng Vi ƀan Măt trâ̆n tơnêi têa Việt Nam kong pơlê tơbleăng ‘na hnoăng cheăng veăng mơjiâng khu kăn pơkuâ, séa ngăn klêi kơ’nâi tiâ rơkong kơ-êng, pơkâ tơleăng mâu rơkong pâ thế dêi kuăn pơlê ƀă po rôh tơpui tơno.

Tơpui mơgêi hneăng hôp, jâ Huỳnh Thị Chiến Hòa, kăn hnê ngăn Hô̆i đong kong pơlê Dak Lak ăm ‘nâi: mâu rơkong tơpui tối ƀă tơdroăng pơkâ a hneăng hôp kố cho tơdroăng luât, ivá ăm mơnhông cheăng kâ rêh ối pơlê pơla, rak tơniăn pơlê pơla gâk kring, mơjiâng khu pơkuâ tơdroăng kal kí a cheăm pơlê dêi kong pơlê tung hơnăm 2024 ƀă mâu hơnăm ki pơtối.