Hneăng hôp ai kơnâ kal khât tung tơdroăng pêi pro châ tơƀrê hnoăng dêi Hô̆i đông pêi cheăng kơpong, rơtế tơpui tơno ‘na ‘’tíu kât’’,’’tíu kreăng’’ mơnhông dế trâm ƀă pơkâ mơ’no, troăng pêi, troăng tơkŭm pêi pro tung la ngiâ; mơdêk tơdjêp tung kơpong, mâu kơpong vâ tơmiêt troh pơkâ mơnhông Tây Nguyên ‘’Krúa lĕm – Tơtro – Krá tơniăn. Teăng mâ mâu khu xiâm, kơvâ cheăng tơnêi têa, mâu kong pơlê kơpong Tây Nguyên, mâu ngế rơkê ƀă ngế cheăng khoa hok hiăng veăng hneăng hôp ƀă veăng tơpui tung tơdroăng tơkêa bro pơkâ.

Troh nôkố, pơkâ kơpong Tây Nguyên hiăng châ pơtroh mâu khu xiâm, kong pơlê vâ pâ rơkong tơpui tối. Khu xiâm hiăng tơdah châ hên tơdroăng veăng tơpui kơnâ vâ kêi đeăng pơkâ ƀă klêi kơ’nâi hneăng hôp roh má 2, xuân tơkôm tơ’nôm mâu tơdroăng veăng kum ing mâu khu xiâm, kong pơlê ƀă mâu ngế cheăng khoa hok vâ pơkâ mơnhông kơpong Tây Nguyên pêi pro tơdroăng tơtro ƀă troăng pêi ton xŏn mơnhông dêi tơnêi têa, djâ Tây Nguyên mơnhông krúa lĕm ƀă krá tơniăn, kâi trâng ƀă kong prâi hơ’lêh.