A Hneăng hôp tơpui tơno, mâu kăn teăng mâ hiăng tối mâu túa ki rơkê tơtro, ti tăng roh tơrŭm cheăng tung kơvâ mơjiâng pro kế tơmeăm khoăng, mơnhông tíu kơdrâm kuăn pơlê rêh ối ƀă thôn pơlê ing mâu kong têa ối tung khu tơrŭm ASEAN ƀă Sinuâ, ing mê, kum pêi pro châ tơƀrê Tơdroăng tơpui tơno 2030 ‘na mơnhông krá tơniăn dêi Khu lâp kong têa.

Xông tơpui a kố, pôa Nguyễn Thanh Nghị, Ngế xiâm pơkuâ mơjiâng pro kế tơmeăm khoăng tối ăm ‘nâi, Việt Nam ối tung khu 10 kong têa ối má môi tơdjâk hên kong prâi pro ôh tá tơniăn, kong prâi hơ’lêh tung lâp plâi tơnêi. Pôa Nguyễn Thanh Nghị hiăng tối mâu troăng tơmiât pêi ƀă pơkâ troăng prôk la ngiâ mơnhông mơdêk tíu kơdrâm kuăn pơlê rêh ối krá tơniăn, krúa lĕm kong prâi, rơkê, kâi trâng ƀă kong prâi hơ’lêh, kơdroh mơ’no trếo ‘mêi lo pakong, xo kuăn mơngế pro ki xiâm ƀă ôh tá ăm ai kơbố tro lôi parŏng.

Ngế xiâm loi tơngah, tơdroăng châ tơƀrê hneăng hôp kố rơtế tơbleăng ‘’Môi tuăn Nam Ninh’’ kô kum kal khât, pơxúa tung tơdroăng mơdêk tơrŭm tâi tâng ASEAN ƀă Sinuâ tối tơdjuôm, tơrŭm cheăng ASEAN ƀă Sinuâ tung kơvâ mơjiâng pro kế tơmeăm khoăng tối krê to a râ ki nếo rơdêi tâ, păng ‘nâng tâ.