VOV4.Xơ Đăng - Hâi lơ 30/5, Hneăng hôp má 3, Kuô̆k hô̆i hneăng má 15 mot măng tĭng pêi cheăng má péa. Tiô tơdroăng, kơxo kố Kuô̆k hô̆i tơmâng Tơbleăng dêi Khu râ kăn séa ngăn ƀă tơpui tơno a hngêi hôp kân ‘na tơdroăng pêi pro tiô troăng hơlâ, luât tung tơdroăng pơkâ pêi sap ing Luât pơkâ pêi ai xêt khât pêi pro.

Kố cho tơdroăng ki kal, xua tâng pơkâ prôk hdrối môi kơteăng, tơniăn tơdroăng mơjiâng pêi pro, dâi lĕm kô rak kum mơnhông mơdêk cheăng kâ – rêh ối pơlê pơla dêi tơnêi têa. Pakĭng roh tơpui tơno hâi kố, tung măng tĭng Kuô̆k hô̆i ối mơdoh 2 hâi pêi cheăng châ rơ’jíu ƀă um tơvi mơ’no tơdrêng. Mê cho hâi lơ 1 ƀă lơ 2/6, tơpui ‘na mơnhên tơ’nôm tơdroăng châ tơƀrê pêi pro pơkâ mơnhông mơdêk cheăng kâ – rêh ối pơlê pơla ƀă liăn ngân tơnêi têa mâu khế apoăng hơnăm 2022; tơdroăng mơgêi pêi pro Pơkâ kơxô̆ 42 hơnăm 2017 ‘na mơnúa tơleăng tơdroăng chĕn ôh tá kâi chêl dêi mâu khu ki ăm mung ƀă tơdroăng pro ton hâi khế xúa tâi tâng pơkâ dêi Pơkâ kố.

A Sa Ly tơplôu ƀă tơbleăng