Kơpong Á – Âu cho mâu kong têa ki hiăng hmâ sap ing nah dêi Việt Nam ƀă nôkố châ ngăn cho kong têa tế hên kế tơmeăm ăm kong têa ê. Kố cho kơpong ki ai 28 to kong têa, sap ing Đông Âu troh Trung Á, kơxô̆ kuăn pơlê lối 400 rơtuh ngế ƀă tâi tâng GDP vâ chê 4.500 rơtal dollars.

9 khế hơnăm 2023, tê mơdró tơmeăm pơla Việt Nam ƀă mâu kong têa kơpong châu Á - Âu châ 8 rơtal dollars. Tung mê, Việt Nam tê kế tơmeăm ăm mâu kơpong kố lối 6 rơtal dollars; rôe tơmeăm ing kong têa ê vâ chê 3 rơtal dollars.

Khu xiâm ngăn tê mơdró tối ƀă hnoăng cheăng cho kơ koan pơkuâ mâu tơdroăng ‘na tơrŭm cheăng kâ - tê mơdró pơla péa pâ ƀă hên troăng a kơpong  châu Á - Âu, kô pơtối tơrŭm ƀă mâu kơ koan khu râ pơkuâ, rơtế ƀă khu mơdró tăng ‘nâi plĕng ƀă xúa rôh ki tơ’lêi vâ tơrŭm cheăng, lêi tah ki xơpá, tơvâ tơvân vâ mơdêk mâu tơdroăng tê mơdró bă ‘no liăn cheăng.