VOV4.Xơ Đăng - Hneăng hôp tơpui tơno dó inâi ‘’Thăm mơdêk hnoăng khu tơrŭm pơlê pơla pêi pro pơkuâ tung rak vế ká xi xŏng ƀă pơkâ ‘na tơnăng ká xi xŏng ôh tá tro luât dó inâi IUU a kơpong têa kơxĭ a kĭng’’ xua Kơ koan xiâm pơkuâ ká xi xŏng tơrŭm ƀă Khu pơkuâ ká xi xŏng Việt Nam ƀă Tơdroăng mơnhông mơdêk Khu lâp kong têa, Khu pơkuâ râng kơxô̆ liăn kong prâi lâp plâi tơnêi – Tơdroăng tŏng kum mâu tơdroăng tơkêa bro kŭn tơkŭm po kơxo lơ 9/6, a kong pơlê Quảng Ngãi.

A hneăng hôp tơpui tơno, mâu khu pơkuâ, khu râ kăn pơkuâ ƀă kuăn pơlê tơnăng ká xi xŏng rơtế tối mâu túa ki rơkê tơtro pêi pro rơtế pơkuâ tung rak vế ká xi xŏng ƀă pêi pro pơkâ ‘na tơnăng ká xi xŏng ôh tá tro luât a kơpong têa kơxĭ a kĭng. Tung mê, mâu khu tơrŭm cheăng pơlê pơla ai hnoăng kal khât tung rak vế ká xi xŏng ƀă tơdroăng séa ngăn hbrâ mơdât tơnăng ká xi xŏng ôh tá tro luât.

Xông tơpui a Hneăng hôp tơpui tơno, pôa Trần Đình Luân, Kăn pơkuâ Kơ koan xiâm pơkuâ ká xi xŏng mơnhên, pơlê pơla ai hnoăng kal păng ‘nâng tung tơdroăng pơkuâ gâk ngăn kuăn kiâ san hô tối krê ƀă rak vế ká xi xŏng kơpong têa kơxĭ pakĭng tối tơdjuôm.