Mơhé tơdjâk xua pơreăng kân COVID-19, hơnăm 2022, hngêi kơmăi Alumin Tân Rai – Kŏng ti pêi cheăng tiô rơnó môi khu meăm Nhôm Lâm Đồng xuân châ pêi lo liăn lối 3.500 rơtal liăn, châ 131% pơkâ pêi. Sap ing tơdroăng châ tơƀrê mơjiâng pro, tíu cheăng kố hiăng nâp liăn ngân ăm hnôu tơnêi têa lối 270 rơtal liăn; tơniăn kơlo rêh ối ăm lối 1.300 ngế pêi cheăng, ƀă pêi lo liăn tơdâng 18,5 rơtuh liăn/môi ngế/môi khế.

Vâ châ tơƀrê kố, Kŏng ti pêi cheăng tiô rơnó môi Khu Nhôm Lâm Đồng  hiăng kơjo vêh mơ’no liăn rôe tơmeăm khoăng, mơdêk ivá chiâng xo eâk meăm sap ing 6.000 tâ̆n tâk 6.500 tâ̆n/hâi. Tơdrêng amê, tơtrŏng thăm pro chiâng pêi xêh kơmăi chiâ xo eâk meăm, djâ 2 tíu kơmăi kơtâu ƀă hyôh dêi hngêi kơmăi on tơhrik kơtâu ƀă têa châu pêi cheăng tâi tâng. Hơnăm 2023, hngêi kơmăi Alumin Tân Rai châ pơkâ mơjiâng 650.000 tâ̆n Alumin.