Hơnăm hriâm kố cho hơnăm apoăng Uông Hân hơhngế rơpŏng hriâm ối tung hngêi trung. Ƀai hriâm apoăng ki hok tro lâm 6, hdroâng kuăn ngo M’Nông châ hriâm a hngêi trung nếo, ôh tá xê ing kơxop hlá mơ-éa hriâm, mê cho pơkâ dêi kơpong tíu ối, ‘na tơdroăng rak ngăn dêi châ chăn, mơgrúa lĕm, krúa lĕm. Mâu hâi apoăng mot hriâm, o kŭn hmâ hmuâ a xoăng krôu xua pâ hngêi. Laga drêng mê, cô pơkuâ lâm đi đo ai mâ ƀă lông, ăm o tâ hơtôu ƀă kơdroh pâ hngêi.

Tơdroăng kố xuân hiăng kum mâu nôu pâ môi tiah nâ H’ Yến Ƀkrông, nôu dêi Uông Hân hmiân tuăn drêng pơtroh kuăn tiô hriâm a hngêi trung:

“Khu lâm 6 tơpui tơdrêng ƀă cô hlối, ai tơdroăng klâi cô tối tơbleăng tung phôn râng kŏng, krôu lơ ôh tá rơbot ƀai xuân pơtroh chư chêh ƀă á ‘nâi tơdroăng dêi kuăn ‘nĕng tơná cho hmiân tuăn. Tíu rêh ối ƀă pơtâp a kố xuân lĕm á ôh tá tô tuăn ki klâi ôh’’.

            Ƀă mâu hok tro lâm kân tâ, Hngêi trung phôh thong hdroâng kuăn ngo ai tíu kâ koi ối pơtê râ má péa phôh thong tơring Lăk nôkố hiăng hmâ ƀă chiâng toăng hngêi tơdjuôm dêi mâu vâi o. Rêm ngế thái cô cho ngế pâ, ngế nôu má péa đi đo achê  rak ngăn, mơhnhôk, pơchân mâu vâi o hriâm tâp.

O H’ Wion Sruk, hok tro lâm 9 tối ăm ‘nâi:

“Thái cô hngêi trung hâk vâ hok tro ƀă đi đo rak ngăn ngin o tá hiâm mơno ing tơdroăng kŭn má môi, môi tiah hdôu pơkhom, kơpuih hngêi ƀă hnê hên tơdroăng ki ê. Á tâ môi tiah ro iâ, xuân tâ pâ dêi hngêi há,  la ai tơdroăng tơmâng khât dêi thái cô môi tiah mê á tâ chía kơdroh tơdroăng ki khéa”.

            Ƀă cô Hoàng Thị Bảy, 16 hơnăm hiăng hmâ ƀă hngêi trung phôh thong râ má péa kuăn ngo ai tíu kâ koi ối pơtê tơring Lăk,  pơla cô hnê a hngêi trung hên tâ ối a hngê. Cô Bảy ăm ‘nâi, xua tơdroăng pơkâ, cho  hngêi trung hnê kuăn ngo ai tíu kâ koi ối pơtê mê hok tro tung hngêi trung hriâm ƀă rêh kâ ối tơkŭm a hngêi trung sap hâi môi troh hâi tơdrốu, bú mơ’nui hâi tơdrốu tê châ nôu pâ lăm xo vêh a hngêi, thăm nếo ai hên vâi o ki xơpá, hngêi ối hơngế, rêm hơnăm, tơdroăng vêh a hngêi kâi vâ riân ƀă hơ’răng kŏng.

Thăm nếo, mâu vâi o akố cho hên hdroâng kuăn ngo pơrá phá troh lăm hriâm, tâng thái cô ôh tá hlê plĕng, ôh tá veăng hơlêm tơpui ƀă vâi o pá vâ châ tơrŭm’’. Cô Hoàng Thị Bảy tối:

“Xua vâi o cho mâu hdroâng kuăn ngo pơrá phá dêi rơpó, mâu vâi o tơpui tơno ƀă dêi rơpó ƀă nâl tơná vâi, tơdroăng mê ngin khŏm athế hriâm chiâng tơpui nâl ki mê. Vâ hlê, ngin thế tí tăng hriăn plĕng kơ-êng hriâm xêh rơkong tơpui, ki vâ bô bối ƀă vâi o vâ vâi o hlê, tối ăm dêi rơpó ‘nâi mâu tơdroăng ƀă mâu vâi o  hlo ối a hngêi trung xuân môi tiah ối a hngêi”.

Tiô cô Nguyến Thị Thùy Diễm, Ngế pơkuâ hngêi trung phôh thong hnê kuăn ngo ai tíu kâ koi ối pơtê râ má péa tơring Lăk, hơnăm hriâm 2023-2024, lâp tung hngêi trung ai 152 ngế hok tro hriâm. Tung mê, ai 96% cho hok tro kuăn ngo ƀă 8 khu hdroâng kuăn ngo. Ki hên mâi vâi o lo ing mâu cheăm  hngế hngo, kơpong hdroâng kuăn ngo tung tơring.

Tơdroăng rêh ối dêi vâi o ối hên xơpá. Xua mê, rêm ngế thái cô hiăng pơkâ ăm tơná, pakĭng tơdroăng cheăng hnê tơdroăng rak ngăn hok tro cho hnoăng pêi pro ƀă tơdroăng hơ-ui pâ. A lâm, mâu thái cô cho thái cô hnê ăm vâi o tơdroăng hriâm vâ rơkê. Lo ing lâm troh a tíu kâ ối, mâu thái cô môi tiah ngế pâ, ngế nôu ki têm rak ngăn dêi mâu kuăn tơná sap ing kâ hmê ta troh tơdroăng koi.

“Thái cô a hngêi trung xuân môi tiah kăn ƀô̆, mâu ki pêi cheăng đi đo rơtế ƀă mâu vâi o. Mâu vâi o troh a kố sap lâm 6, xuân môi tiah mâu kuăn tơná há. Xua mê, mâu thái cô kăn ƀô̆ cheăng a hngêi trung đi đo rơtế ƀă vâ hnê mâu vâi o hmâ ƀă hngêi trung”.

Ing tơdroăng hơ-ui pâ, tơmâng ngăn khât, tơmâng rak cho hnoăng cheăng pêi pro dêi ngế pâ nếo nôu ki má péa kố hiăng mơhnhôk ăm mâu vâi o hriâm a hngêi trung phôh thong hnê kuăn ngo ai tíu kâ koi ối pơtê râ má péa tơring Lăk mơ-eăm hriâm, rơnêu pât tơná ƀă tơdroăng tuăn loi “Hâi kố lăm hriâm hơngế/ Troăng tung la ngiâ troăng achê”. Ƀă dế drô troăng ki mê, đi đo rơtế ai ƀă, veăng hnê mơhno dêi mâu thái cô  dêi hngêi trung’’