Klêi kơ’nâi séa ngăn tơpui tơno, Hô̆i đong hnê ngăn kong pơlê Dak Lak hiăng môi tuăn tơbleăng 2 tơdroăng pơkâ, mê cho: Tơdroăng “Pơkâ nhên yă ‘na khăm pơlât dêi mâu tíu khăm pơlât tơnêi têa a kong pơlê Dak Lak” ƀă Pơkâ kơlo liăn hrê ăm tơdroăng tơkŭm po tê mơdró pêi pro ‘no hrê mơhá liăn tŏng gum pơlê pơla ăm mâu ngế ki châ tŏng gum pơlê pơla.

Jâ Huỳnh Thị Chiến Hòa, Kăn hnê ngăn Hô̆i đong hnê ngăn kong pơlê Dak Lak ai tối tiah kố: tá péa tơdroăng pơkâ kố châ tơbleăng ƀă tơdroăng ki môi tuăn khât, mơhno ivá khŏm mơ-eăm dêi kong pơlê tung tơdroăng ki rak ngăn tŏng gum tơdroăng rêh ối ƀă ivá kuăn pơlê. Hô̆i đong hnê ngăn kong pơlê pơkâ thế Vi ƀan hnê ngăn kong pơlê hnê mơhno mâu râ kơvâ cheăng, rĕng tơbleăng pêi pro tơƀrê, ai pơxúa mâu tơdroăng pơkâ ki hiăng châ pơkâ pêi pro a hneăng hôp.