Ki nhên, ‘na peăng Hô̆i đong kuăn pơlê, mâu ngế châ tâ phĭu rah xo cho Kăn hnê ngăn ƀă 2 Kăn phŏ hnê ngăn Hô̆i đong kuăn pơlê, rơtế 4 kăn pơkuâ cheăng. Peăng Vi ƀan kong pơlê, Kăn hnê ngăn Vi ƀan kong pơlê, rơtế 1 kăn phŏ hnê ngăn, 25 ngế ối tung Vi ƀan kong pơlê cho Kăn pơkuâ khu pơkuâ cheăng ƀă mâu kăn pơkuâ kơvâ cheăng.

Châ tơƀrê ăm hlo, ai 21/27 ngế châ kơxô̆ phĭu loi tơngah hên lối 50%. Tung mê, pôa Hồ Văn Niên – Kăn pơkuâ hnê ngăn cheăng Đảng kong pơlê, Kăn hnê ngăn Vi ƀan kong pơlê Gia Lai ai kơxô̆ phĭu rah xo hên má môi cho 62/64 phĭu. Ôh tá ai kăn teăng mâ ki lâi ai kơxô̆ phĭu râ xo iâ hluâ 2/3 tâi tâng kơxô̆ phĭu.

Xuân a hneăng hôp kố, Hô̆i đong kuăn pơlê kong pơlê Gia Lai hiăng séa ngăn pơkâ ƀă tơbleăng ăm pêi pro ăm pôa Hồ Văn Điềm – Kăn cheăng tung Khu pơkuâ hnê ngăn cheăng Đảng kong pơlê, Kăn hnê ngăn Mât trâ̆n tơnêi têa Việt Nam kong pơlê, Kăn cheăng tung Khu pơkuâ cheăng kâ – Liăn ngân Hô̆i đong kong pơlê, teăng mâ Hô̆i đông kong pơlê Gia Lai pơtê pêi hnoăng cheăng kăn teăng mâ Hô̆i đong kuăn pơlê kong pơlê.