VOV4.Xơ Đăng - Kơxê lơ (22/6), Hô̆i đong kong pơlê Dak Lak tơkŭm po hneăng hôp tơpui tơdroăng ka roh má 3, Hô̆i đong kong pơlê hneăng 10, hneăng 2021-2026 ing hên tơdroăng pơkâ ki kal tơdjâk troh mâu tơdroăng tơkêa bro dêi tơdroăng ‘mâi mơnhông ƀă mơdêk cheăng kâ-rêh ối. A hneăng hôp mâu kăn hiăng tơpui, môi tuăn ƀă tơbleăng pơkâ ‘na troăng rơhlâ ‘no liăn pêi pro 8 tơdroăng tơkêa bro xúa liăn ngân Tơnêi têa dêi Tơdroăng ‘mâi mơnhông ƀă mơdêk cheăng kâ rêh ối ƀă mâu pơkâ.

Hô̆i đong kong pơlê Dak Lak pơkâ 8 tơdroăng tơkêa bro dêi Tơdroăng ‘mâi mơnhông ƀă mơdêk cheăng kâ-rêh ối

‘Mâi hơ’lêh troăng rơhlâ ‘no liăn pêi tơdroăng tơkêa bro Mơnhông pơlê kong kân túa má 2 a Quảng Nam, Hà Tĩnh ƀă Dak Lak; Tơdroăng tơkêa pro ki kŭn dêi Ƀuôn Ma Thuột; ai hnê tối ‘na ‘mâi hơ’lêh troăng rơhlâ ‘no liăn ‘mâi rơnêu pro ƀă mơdêk tơniăn tâi tâng. Tơbleăng a hâi mơgêi hneăng hôp, pôa Y Vinh Tơr, Ngế hbrâ cheăng dêi tíu xiâm Đảng, Kăn hnê ngăn Hô̆i đong kong pơlê, ngế pơkuâ djâ khu kăn Kuô̆k hô̆i kong pơlê Dak Lak pơkâ thế, ƀă 8 tơdroăng tơkêa bro dêi Tơdroăng ‘mâi mơnhông ƀă mơdêk cheăng kâ rêh ối, Vi ƀan kong pơlê rĕng hnê mơhno mâu tíu pêi cheăng, kơvâ cheăng, kong pơlê, mâu khu pơkuâ ‘no liăng cheăng hbrâ hdrối mâu tơdroăng, hlá mơ-éa ai tơdjâk troh.

Gương tơplôu ƀă tơbleăng