VOV4.Xơ Đăng - Troăng hơlâ tŏng kum, liăn khế ôh tá tŭm vâ rêh kâ tung tơdroăng rêh ối, tơdroăng cheăng hngăm hngo pro hên mâu kăn ƀô̆ gak ngăn kong pơtê cheăng, hên tơdroăng tơkêa bro on tơhrik kơtâu ƀă khía a Gia Lai hiăng kêi đeăng laga tá hâi châ mơnhên ăm mơjiâng pro on tơhrik vâ tê ƀă hía hé cho mâu tơdroăng ki tô châ kuăn pơlê, mâu ngế pêi cheăng tung Hô̆i đong kuăn pơlê kong pơlê Gia Lai rơhêng vâ ‘nâi plĕng, tơpui tơno a hneăng hôp Hô̆i đong kuăn pơlê kong pơlê hneăng má 12 hâi hnah, 8/7.

A roh kơ-êng mâu ngế pêi cheăng tung Hô̆i đong kuăn pơlê kong pơlê Gia Lai, hên tơdroăng châ kuăn pơlê ƀă pơlê pơla rơhêng vâ ‘nâi plĕng châ tối a hneăng hôp. Tung mê, má môi cho tơdroăng gak ngăn kong ối hên tơdroăng pá puât, mơ’nhê tê kơtê liăn ing mâu tơdroăng tơkêa bro on tơhrik kơtâu ƀă khía tá hâi tơdjêp, tơdroăng tê tơnêi pêi chiâk deăng ai hên.

Pôa Lưu Trung Nghiã, Kăn ngăn 'na chiâk deăng ƀă mơnhông thôn pơlê tơpui tung hneăng Hôp Hô̆i đong hnê ngăn kong pơlê Gia Lai

Tiâ rơkong ‘na mâu tơdroăng pá puât tung pơkuâ gak ngăn kong, pôa Lưu Trung Nghĩa, Kăn pơkuâ Khu pơkuâ ‘na pêi chiâk deăng ƀă mơnhông mơdêk thôn pơlê, Kăn teăng mâ Hô̆i đong kuăn pơlê kong pơlê Gia Lai tối: Tung pơla kố nah, khu cheăng pơkuâ gak ngăn kong tung kong pơlê Gia Lai pơtối pâ pơtê cheăng pro mơngế pêi cheăng tung kơvâ kố kơdroh hên. Xiâm kối cho xua pêi lo liăn iâ, mâu troăng hơlâ tŏng kum tá hâi tơxâng ƀă ivá mơ’no, ki rơhêng vâ tối cho pá ‘na tơdroăng cheăng hngăm hngo ó.

A Sa Ly tơplôu ƀă tơbleăng