VOV4.Xơ Đăng - Pơxiâm sap hâi lơ 26/4 troh tâi hâi lơ 3/5, hok tro lâm 12 tung lâp tơnêi têa kô chiâng mot tung phân mêm pơkuâ tơ’noăng dêi Khu xiâm pơkuâ hnê hriâm ƀă Hnê mơjiâng tuăn ngôa rơkê vâ mơnúa kĭ veăng tơ’noăng mơgêi râ má pái trung hok phôh thong hơnăm 2022 ƀă troăng mơ’no tơdrêng tung um tiô troăng măng Internet. Kố cho hơnăm apoăng hok tro kĭ tơ’noăng mơ’no tơdrêng tung um tiô troăng hyôh măng Internet teăng tơdrêng ƀă phĭu môi tiah rêm hơnăm.

Xua mê, Khu xiâm pơkuâ hnê hriâm ƀă Hnê mơjiâng tuăn ngôa rơkê mơdoh dâng 1 măng tĭng vâ hok tro ti tăng plĕng tơdroăng chêh pro tung phân mêm, ahdrối pêi pro kĭ veăng tơ’noăng mơ’no tơdrêng tung um tiô troăng hyôh măng Internet ki khât păng ‘nâng. Khu xiâm xuân hiăng mơnúa kĭ tơdrêng tung um ing hyôh măng Internet a 2 hngêi trung râ má pái phôh thong kơpong pá puât dêi kong pơlê Bắc Giang ƀă Hòa Bình. Tơdrơang mâu hok tro pêi pro kĭ tơdrêng tung um tiô troăng hyôh măng Internet cho tơ’lêi hlâu.

Klêi kơ’nâi môi pơla kĭ mơnúa, sap hâi lơ 4/5 troh 17 chôu hâi lơ 13/5, hok tro kô pêi pro kĭ veăng tơ’noăng tơdrêng tung um tiô troăng hyôh măng Internet ing phân mêm pơkuâ a hngêi trung phôh thong.

A Sa Ly tơplôu ƀă tơbleăng