Hâk phiu sâp dêi hmân ếo nếo hdroâng kuăn ngo dêi mơngế K’Ho, o Sruk Đan, hok tro lâm 9, Hngêi trung phôh thong hdroâng kuăn ngo ái tíu kâ koi ối pơtê tung hngêi trung râ má péa tơring Dam Rông, kong pơlê Lâm Đồng, tối ăm ‘nâi:

  “Á hơnăm kố to lâm 9, xua mê hngêi trung pơkâ tơkŭm a hơnăm hriâm nếo rĕng tâ, sap hâi lơ 22/8. Mâu pú hmâ rơtế môi lâm troh tơkŭm hâk vâ dêi pó. Hơnăm kố, cho hơnăm mơ’nui râ xua mê ngin o hbrâ tung tơdroăng hriâm tâp. Mot hơnăm hriâm nếo, tơmeăm khoăng dêi hngêi trung ai tŭm, krúa lĕm, hngêi trung lâm châ mơ’no rơnêu, á o hâk phiu ‘nâng.

A roh pơtê hriâm kố nah, á châ vêh a hngêi, á kum nôu pâ hên tơdroăng cheăng môi tiah pế hmê, hleăng mơngĕn, tŏng kum, mơhnhôk ngế nâ châi tamo vâ rĕng lĕm. Hơnăm kố nah, tơdroăng hriâm tâp dêi á xuân tá hâi hôm to lâi, xua mê, tung hơnăm hriâm nếo kố, á kô mơ-eăm hriâm vâ châ điêm hên vâ ôh tá ăm nôu pâ khéa ôh, nôu pâ hiăng mơ’no liăn ăm hriâm tâp troh tá tui lui’’.

Tơring Dam Rông cho kơpong pá puât má môi dêi kong pơlê Lâm Đồng, ƀă kơxô̆ kuăn pơlê hdroâng kuăn ngo châ 70% pơ’leăng mâ mơngế. Mâu hơnăm hiăng hluâ, Đảng ƀă Tơnêi têa hiăng tơmâng tŏng kum tơdroăng hnê hriâm ƀă hnê mơjiâng tuăn ngôa rơkê a tơring. Rơtế kế tơmeăm khoăng, hngêi trung lâm châ mơ’no liăn pro lĕm, hok tro hdroâng kuăn ngo a kố xuân châ tŏng kum dêi Đảng ƀă Tơnêi têa. Ki rơhêng vâ tối, hlê plĕng dêi kuăn pơlê tung tơdroăng ăm kuăn ‘nĕng hriâm tâp xuân mơdêk hên. Tung hâi pơxiâm hơnăm hriâm nếo, jâ Me Nhi djâ kuăn troh hngêi trung vâ mơhnhôk kuăn tơná hriâm rơkê tâ:

“Drêng mot hriâm lâm 6, hngêi trung hdroâng kuăn ngo a tíu kâ koi ối pơtê tơring, châ hngêi trung mơnhên troăng prôk cho o ki lâi hriâm rơkê kô ai hnoăng liăn hriâm rơkê châ ăm lăm hriâm a kong têa ê. Tơdroăng pói vâ dêi muăn cho mơ-eăm hriâm rơkê vâ châ xo hnoăng liăn hriâm rơkê mê vâ lăm hriâm a kong têa Nhuk. Xua mê, thế rak ngăn ƀă tâi ivá tơná mơ-eăm, vâ la ngiâ klêi mơgêi râ má pái, muăn châ xo hnoăng liăn hriâm rơkê mê.

Rơpŏng á xuân pro tơ’lêi hlâu tâi ivá ăm kuăn ‘nĕng, pakĭng liăn ngân ki ‘măn kơdĭng, rơpŏng xuân mung tơ’nôm liăn ăm muăn hriâm a kong têa Nhuk, hlối pêi cheăng há’’.

Ki rơhêng vâ dêi jâ Me Nhi cho ôh ti xê to ‘no liăn ăm kuăn hriâm rơkê tung tơnêi têa mê athế châ lăm hriâm a kong têa ê. Rơpŏng ai 3 ngế kuăn, kuăn rơmúa hriâm rơkê vâ 2 ngế o gá tiô ƀối.

“Klêi kơ’nâi kuăn rơmúa, rơpŏng á xuân ối ai 2 ngế kuăn xuân dế hriâm. Péa ngế kuăn kơ’nâi, mê rơpŏng á xuân mơhnhôk mâu vâi muăn pơtối tiô ƀối nâ prế. Mot tung apoăng hơnăm hriâm, rơpŏng á roê tŭm mâu hlá mơ-éa hriâm, hlá mơ-éa chêh, hmân ếo, roê rơxế kơtâu ƀă on tơhrik vâ ăm kuăn kơto lăm hriâm, xua hngêi trung kơtăn ing hngêi lối 1km. Môi iâ cho xua ivá mơ-eăm rơhêng vâ hriâm dêi kuăn, rơpŏng xuân pro tơ’lêi hlâu khŏm mơ-eăm tâi ivá. Tối tơdjuôm, mâu vâi muăn rơpŏng hngêi nâ á rơhêng vâ hriâm, mê á xuân hâk tơngăm ƀă mơ-eăm ăm vâi troh hngei trung hriâm chư”.

Tung mơngiơk ngiât dêi kong, Hngêi trung phôh thong hdroâng kuăn ngo ai tíu kâ koi ối pơtê râ má péa hngêi trung hriâm a tơring Dam Rông (kong pơlê Lâm Đồng) eăng bâ ƀă mơngiơk nếo, tơdah hơnăm hriâm nếo 2023 – 2024. Thái Nguyễn Hữu Hanh – Kăn phŏ pơkuâ hngêi trung phôh thong hdroâng kuăn ngo ai tíu kâ koi ối pơtê Râ má péa tơring Dam Rông ăm ‘nâi, maluâ a kơpong hngế hngo, la kơƀăng tăng dêi hngêi trung xuân ối krip lĕm, rak tơniăn hnoăng cheăng hnê ƀă hriâm. Hơnăm hriâm nếo kố, sap ing kơxô̆ liăn Tơdroăng pơkâ dêi tơnêi têa mơnhông mơdêk cheăng kâ rêh ối pơlê pơla kơpong hdroâng kuăn ngo ƀă kong ngo pơla hơnăm 2021 – 2030, hngêi trung hiăng châ ‘mêng rơnêu lĕm tâ, sap ing lâm hriâm troh kơpong ối pơtê .

“Nốkố, kế tơmeăm dêi hngêi trung hlo lĕm krip. Mâu khu lâm hriâm châ sơng, krâ gât lĕm, gât mơnât krúa lĕm; kum ăm hnoăng cheăng hnê hriâm. Kơpong ối pơtê dêi hok tro xuân châ sơng pik, klĕm gât a mơnât, rak tơniăn lĕm má môi ăm tơdroăng kâ koi ối pơtê ăm mâu hok tro”.