Kố cho kơxô̆ liăn ki hên má môi sap ing hdrối nah troh nôkố ƀă cho hơnăm ƀlêi trâng dêi tê phái ngi kong têa ê dêi tơnêi têa pin. Tơdrêng amê, mơnhên hơnăm 2024 ăm hlo, kơchơ mơdró báu phái pơtối kơdrâm drêng mâu kong têa thăm rôe vâ tơniăn bê kế kâ. Xiâm kối dêi tơdroăng cho kơxô̆ báu phái tung lâp plâi tơnêi dế rế hía rế iâ, ƀă Việt Nam dế ai roh tơ’lêi hlâu tê phái ngi kong têa ê.

Tiô riân tơdroăng kal vâ dêi mâu kong têa lâp plâi tơnêi cho hên, tung mê, ai mâu kơchơ mơdró tiô khôi vâi krâ nah kong têa Philippines, Indonesia lơ Sinuâ. Tiô Khu xiâm pơkuâ ‘na pêi chiâk deăng ƀă mơnhông mơdêk thôn pơlê rơnó báu rơnó xeăng tô hơnăm 2023 – 2024 kơpong tơbăng kroăng Cửu Long kô pêt vâ chê 1,5 rơtuh ha ƀă pêi lo châ lối 10 rơtuh tâ̆n báu tơkŭm tung mâu hdrê báu xú kơhiâm, dâi lĕm vâ tê ăm kuăn pơlê tiô tơdroăng kal vâ tung tơnêi têa ƀă tê ngi kong têa ê.