A Kơpong tíu tơbâ ton nah kăch măng Đông lêng dêi Đảng kong pơlê Kon Tum a cheăm Măng Ri, tơring Tu Mrông, lối 100 đoân viên droh rơtăm mâu tíu pêi cheăng: kong pơlê Kon Tum, Sư đoân 10, Khu xiâm pơkuâ ngăn lêng kong pơlê, Khu xiâm pơkuâ ngăn Mố đô̆i gak tơkăng kong dêi kong pơlê ƀă Kŏng an kong pơlê hiăng rơtế têk nhang, pleăng reăng mơhno hiâm mơno pâ nhoăm, mơnê hnoăng pleăng dêi mâu pâ pôa rơxông hdrối nah dêi kăch măng.

Rôh kố a thôn Mô Po, cheăm Mường Hoong, tơring Đăk Glei, hơnăm ối nếo 5 khu ngế tung kong pơlê Kon Tum xuân diâp tơmeăm mơjiâng pro “Troăng mâu droh rơtăm bâ eăng pơlê” ăm 30 rơpŏng kuăn pơlê Rơteăng. Tơmeăm khoăng mê ai 29 to pul on ai hmốu ki hrik ing eăng trâ mâ hâi kơnâ 50 rơtuh liăn, gum kuăn pơlê tơ’lêi hlâu tung prôk lăm a kơmăng.