VOV4.Xơ Đăng - Tung tơdroăng hâi kố, ngin mơdoh chôu tối ‘na tơdroăng mơ-eăm dêi mâu rơxông ối nếo mâu pơlê Tây Nguyên hriâm tâp, tiô ƀối mâu rơxông jâ pôa, nôu pâ, djâ troăng ahdrối mơ-eăm tung hên tơdroăng xua pơlê pơla, rak mơnhông mơdêk khôi túa lĕm tro kum pro tơniăn cheăng kâ klêi kơ’nâi pơreăng COVID-19, tơdjuôm ivá mơjiâng thôn pơlê nếo, tíu xiâm tê rôe mơdró tơmeăm rơkê.

*** Cho rơxông nếo, xông kân tung tơdroăng rêh ối hơniâp, ngoh A Phun, pêi cheăng a Tíu xiâm hnê cheăng pêi Yăo yuk thưong xuyên tơring Tu Mrông, kong pơlê Kon Tum ‘nâi mê kơ mâu rơxông pôa, pâ hiăng hlâ xua vâ pro tơniăn le\m ăm tơnêi têa. Drêng rôh tơbâ troh tơnêi têa châ tơleăng le\m peăng Hdroh lâp tơnêi têa tơrŭm môi lơ 30/4, ngoh xuân djâ dêi kơdrâi kuăn lăm pôu ngăn tíu tơbâ ton nah kăch măng xiâm tíu pêi cheăng Đảng kong pơlê Kon Tum a cheăm Măng Ri.

Akố tung pơla hơnăm 1960 -1972, khu kăn Đảng kong pơlê Kon Tum hiăng hnê mơhno klêi tơdroăng 4 hneăng hôp Đảng bộ kong pơlê (ing hneăng hôp má 1, hâi lơ 9/3//1060 troh hneăng hôp má 4, hâi lơ 26/10/2071, pơkâ mâu troăng rơhlâ ki kal, hnê mơhno mâu lêng ƀă kuăn pơlê mâu hdroâng kuăn ngo tơplâ xâ Mih tŏng kum tơnêi têa.

Ngoh A Phuh rơrêk tung hiâm mơno tối:

“Á cho rơxông nếo, mơnê khât kơ hnoăng pôa pâ hiăng mơhno ăm tơdroăng châ rêh ối hơniâp le\m môi tiah hâi kố. Ƀă tơdroăng hâk vâ hriâm, đi đo hriâm tơdroăng ki nếo, tơdroăng ki apoăng á tơmiêt tiah kố, thế rak vế pêi pro tro tiô troăng rơhlâ, dêi Đảng, luât tơnêi têa, đi đo hriâm mơdêk hnoăng cheăng pêi, po rơdâ tơdroăng rêh ối, tơmâng xo tơdroăng hriăn plĕng dêi khoa hok nôkố vâ veăng ‘no mơjiâng pơlê pơla rế mơnhông tơ-ƀrê, tơxâng ƀă mơnhông mơdêk tơnêi têa tơchoâm dêi lâp tơnei têa. A môi tuăn tiô Đảng, tiô Pôa Hồ, khŏm veăng ‘no ivá ki kŭm dêi tơná vâ mơjiâng pơlê pơla rế mơnhông tơƀrê le\m tâ”.

*** Mơ-eăm pá puât ti tăng plĕng, hriâm tâp, xúa khoa hok kih thuât tung pêi chiâk deăng, rơpŏng ngoh Điểu Nanh, ối a ƀon Bu N’Jang, cheăm Trường Xuân, tơring Dak Song, kong pơlê Dak Nông hiăng ai tơdroăng rêh ối kro mơdrŏng. Điểu Nanh tối ăm ‘nâi, hơnăm 2011, ngoh khên tơnôu mung liăn hngêi arak liăn kum rêh ối pơlê pơla rôe hdrê pêt, phon rơvât mơ’no pêt 8 ha kơphế, tiu ƀă rêm hơnăm pêt tơvât pôm prel, alâi vâ ai liăn rak ngăn loăng plâi ton hâi.

Ing kơdrum kơphế, tiu ăm pêi lo liăn tơniăn, tơdroăng cheăng kâ dêi rơpŏng ngoh rế hía rế krá tơniăn, mơjiâng hngêi kân rơdâ, rôe rơxế ô tô ƀă mơ’no liăn ăm kuăn ‘nĕng hriâm tâp. Rơtế ƀă mơnhông mơdêk cheăng kâ, ngoh ối kum ăm kuăn pơlê mung liăn ôh tá xo liăn tơkâ hrĭng rơtuh liăn vâ ai kơxô̆ liăn pêt mơjiâng tơmeăm khoăng, ƀă hiăng kum 6 rơpŏng tung pơlê mơ-eăm hluăn ing kơtiê. Ngoh Điểu Nanh tối:

‘’Kơnôm tơmâng tŏng kum dêi Đảng, tơnêi têa, tơdroăng rêh ối dêi á nôkố xuân hiăng hôm tâ hdrối nah hên. Á pêi cheăng kâ, pêi kơphế, pêi kơxu pêi lo liăn xuân tơniăn. Á xuân châ kuăn pơlê loi tơngah, hâk pâ rah xo pro kăn pơkuâ pơlê vâ kô kum tơ’nôm hên ngế mơnhông mơdêk cheăng kâ.

*** Ôh tá mơhúa tro chó a chêng xua tro ối sap tơxĭn nah, ngoh Y Phăng Mlô, ối a [uôn Jok, cheăm Ea H’Đing, tơring Čư Mgar, kong pơlê Dak Lak hiăng mơ-eăm tơkâ luâ xơpá vâ mơ-eăm pêi cheăng, rak ngăn dêi tơná. Ngoh hriăn tơmiât pêi xêh, po tíu meăn pro tơ’lo, vó tâ reăng vâ tăng tơ’nôm liăn, kum rơpŏng hngêi. Trong nôkố, kơ’nâi 8 hơnăm pêi cheăng ‘na ki mê, ngoh hiăng ai tíu tê dêi tơniăn, tâng riên rêm khế pêi tê châ hrĭng to tơmeăm, xo dêi tơkâ rêm hơnăm lối hrĭng rơtuh liăn.

Pơla hdrối kô nah, ngoh hâk tơngăm châ môi tung 50 ngế hơnăm ối nếo ki chó châ khe\n kơdeăn tung tơdroăng ‘’eăng bâ ing tuăn mơ-eăm dêi Việt’’ hơnăm 2021 xua Tíu xiâm ngăn Khu droh rơtăm Việt Nam tơrŭm ƀă Vi ƀan dêi tơnêi têa ngăn ‘na mơngế chó chêng tơvê kŏng Việt Nam tơkŭm po.

Y Phăng Mlô tối:

‘’Á thế mơ-eăm xua á hlo dêi tơná hiăng chó xuân ôh tá hêng nôu pâ ƀă nhŏng o xiâm tung rơpŏng hngêi tô tuăn ăm tơná. Môi tiah nôkố tơdroăng cheăng tơniăn mê a xuân púi vâ la ngiâ kô mơnhông tơ-brê hên tâ nếo, châ hên ngế ‘nâi tíu a mơjiâng pro troh lăm rôe hân tâ nếo. Drêng châ po rơdâ mơjiâng pro á kô tăng mơngế veăng pêi, kum ăm mâu ngế ki hâi teăm ai cheăng pêi.

Gương - A Sa Ly tơplôu [ă tơbleăng