Hâi mơdĭng pơxiâm pêi cheăng hơ’lêh nếo tơmiât rơkê cho tơdroăng ki châ tơkŭm po tiah hmâ ăm mâu ngế pơxiâm vâ pêi cheăng tơmiât rơkê, ối tung tơdroăng tơkêa Tŏng kum tơdroăng pơxiâm vâ pêi cheăng hơ’lêh nếo tơnêi têa troh hơnăm 2025 (Tơdroăng pơkâ 844 dêi Ngế pro xiâm hnê ngăn Chin phuh).

Hơnăm kố, a Dak Lak tơdroăng kố châ tơkŭm po ƀă hên tơdroăng, môi tiah: mơđah tơbleăng 150 kơbong tê tơmeăm pơxiâm pêi cheăng, kế tơmeăm OCOP, kế tơmeăm kơmăi kơmok xúa tung thôn pơlê ƀă mâu kế tơmeăm xúa tung ôm hyô a kong pơlê. Rôh hôp tơdroăng cheăng pêi ƀă pơxiâm pêi cheăng hơ’lêh nếo tơmiât rơkê.

Tiâ mơnhên hnê mơhno chêh bro mâu hlá mơ-éa mơjiâng khu mơdró kâ, tiâ mơnhên chêh inâi, chêh tối tơdroăng nâp hnoăng liăn mơhá; tơbleăng tơdroăng ăm mung liăn kơjo, tŏng kum xúa chư kĭ kơxô̆, phần mề kế toán mơdró kâ. Mâu rôh hôp ki ai tơdjâk tŏng kum khu mơdró kâ hmâ, mơnhông; tơdjêp tê ƀă roê kế tơmeăm; troăng hơlâ mơjiâng bro kế tơmeăm pêi lo ing chiâk deăng tơniăn.