Tơpui a rôh hôp, pôa Lại Xuân Lâm, Ngế xiâm phŏ hnê cheăng Đảng ủy Khô̆i mâu kơ koan xiâm tơnêi têa ăm ‘nâi, hơnăm 2025  cho hơnăm ki ai hên tơdroăng po hôp hlối leh kân dêi tơnêi têa, xua mê tung mâu hâi apoăng hơnăm 2025, mâu đảng ủy thế tơkŭm ƀă tơdroăng pêi kơtăng, kơhnâ má môi tung tơdroăng tơbleăng mâu tơdroăng cheăng kal kí; rak tơniăn pêi mâu tơdroăng cheăng mô  mơnêi, pêi tơ’nôm râ kơpêng, ôh tá xua ing xing xoăng rah xo iâ mơngế pêi cheăng ăm tơnêi têa mê vâ pơtê ‘nôi ôh tá pêi mô mơnêi  tơdroăng cheăng kal kí.

Malối, pơtối tă tăng ‘nâi plĕng, hbrâ tăng ‘nâi mâu tơdroăng tung mơjiâng, rah xo iâ mơngế ki pêi cheăng ăm tơnêi têa tiô hnê mơhno dêi Tíu xiâm ƀă Kăn xiâm pơkuâ hnê ngăn cheăng Đảng ƀă tơdroăng “hlối kơtâu, hlối pơtăng’’; tung mê, tơmâng khât ‘na pâ thế  tăng khu kăn pêi cheăng, khu pêi cheăng ton hơnăm, kơxô̆ kăn ƀô̆ pơkuâ cheăng dêi râ ủy rêm râ, tơniăn mâu luât pơkâ tŏng gum ki tơdjâk troh. Ing mê, vâ ‘no hnoăng pêi tơƀrê tơdroăng rah xo iâ mơngế pêi cheăng ăm tơnêi têa, tơdroăng cheăng pêi tơƀrê ai pơxúa.