Hneăng hôp châ tơdjêp mơ’no tơdrêng troh a tíu pêi cheăng Vi ƀan hnê ngăn 28 to kong pơlê, pơlê kong kân kĭng têa kơxĭ ƀă mâu khu xiâm, kơvâ cheăng tơdjâk troh. Tơbleăng a rôh hôp, Ngế pro xiâm phŏ hnê ngăn Chin phuh Trần Lưu Quang tối nhên, ki kôm ăm hlo dêi tơdroăng ôh tá mơhúa dêi tơdroăng ôh tá vâ tah “Theh tríng” EC ƀă tro “Theh khêi” mê ôh tá xê to tro lŭp ‘bă cheăng kâ mê ối pro ki nhoăm dêi Việt Nam rế chu kơdroh ó, kơvâ păn rơnăng ká xi xŏng kô trâm pá môi tiah “Theh tríng” a mâu kơchơ tê mơdró dêi EU.

Ngế pro xiâm phŏ hnê ngăn tơnêi têa thế mâu khu râ pơkuâ cheăng pơkâ kơtăng a têa kơxĭ mơdêk lăm séa ngăn, tăng ngăn nhên, pôi tá ăm mâu plong tuk ki lâi pro xôi a têa kơxĭ kong têa ê. Khu xiâm kŏng an thâ séa ngăn, mơnhên mâu tơdroăng tơdjâk troh ki xôi luât thê ‘nâi nhên xiâm tơmeăm ká xi xŏng; ngăn a hồ sơ chêh, săm phoăng rup mâu ki xiâm tăng mơhno, djâ mâu plong tuk tơnăng ká, kuăn pơlê Việt Nam lăm tơnăng ká ôh tá tro luât a kơpong têa kơxĭ kong têa ê.