VOV4.Xơ Đăng - Kơxo lơ 4/7, a Hà Nội, Ƀơrô cheăng Kăn xiâm hnê ngăn tơnêi têa tơrŭm ƀă Khu xiâm ngăn Kŏng an, Khu xiâm ngăn tơpui kâ ƀă Viê̆n Arak luât xiâm tơkŭm po hôp tơbleăng tơdroăng pơkâ ‘na ăm lo hdrối tâ hâi khế pơkâ ƀă mâu ngế ki kroăng phâk hơnăm 2022 dêi Kăn xiâm hnê ngăn tơnêi têa Kŏng hòa xah hô̆i chuh nghiah Việt Nam hâi lơ 2/9 la ngiâ. Tiah mê, mâu ngế ki ăm lo hdrối tâ hâi khế pơkâ hơnăm kố tung mê cho ngế ki pêi pro tro mâu tơdroăng ki pơxâu, ối tung hngêi phâk, ai hâi khế pơkâ, ngế ki tro ai pơkâ thế kroăng phâk plâ rơxông hiăng châ kơdroh hâi khế kroăng phâk ai hâi khế pơkâ, ngế ki dế châ thế pơtê kroăng phâk pêi pro tơdroăng kroăng phâk.

Hôp tơbleăng pơkâ ăm lo ing kroăng phâk hdrối tâ hâi khế pơkâ hơnăm 2022 dêi Kăn xiâm hnê ngăn tơnêi têa

Hâi khế hiăng pêi pro tơdroăng kroăng phâk vâ séa ngăn ăm hlo hdrối tâ hâi khế pơkâ riân troh hâi lơ 31 khế 8 hơnăm 2022. Tơdroăng tơbleăng ‘na tâi tâng kơxô̆ ngế châ ăm hlo hdrối tâ hâi khế pơkâ tung rôh kố, Thiê̆u tươ̆ng Nguyễn Văn Long, ngế xiâm phŏ ngăn Kŏng an ăm ‘nâi, ăm lo hdrối tâ hâi khế pơkâ séa ngăn tiô pơkâ mê tá hâi ai kơxô̆ ki lâi nhên; mâu ngế ki ai tŭm tơdroăng kô châ ăm hlo hdrối tâ hâi khế pơkâ. Drêng séa ngăn ăm hlo hdrối tâ hâi khế pơkâ mê tâi tâng mâu ngế ki kroăng phâk pơrá tơdâng tơ’mô môi tiah dêi rơpó tâng ai tŭm tơdroăng ki châ séa ngăn.

Katarina Nga tơplôu ƀă tơbleăng