Kơxo hâi lơ 9/8, a pơlê kong kơdrâm Nha Trang, kong pơlê Khánh Hòa, Rơ’jíu xiâm Việt Nam, Khu hnê mơhnhôk cheăng xiâm tơnêi têa, Khu xiâm ngăn tơdroăng kal kí Lêng Việt Nam- Khu xiâm pơkuâ ngăn lêng ƀă Vi ƀan hnê ngăn kong pơlê Khánh Hoà tơkŭm po Tơdroăng hôp ƀă khu chêh hlá tơbeăng, tối ‘na tơdroăng tơpui ‘na ngê̆ thuât “Rơdêi kro mơdrŏng ing têa kơxĭ pơlê pơla”.

Kố cho tơdroăng tơpui ‘na ngê̆ thuât ki kân dêi tơnêi têa vâ mơhnhôk hâk tơngăm, nhoăm hdroâng mơngế, tuăn mơ-eăm kring vế hnoăng pơkuâ têa kơxĭ, chuăn rơlố Tơnêi têa, ƀă vâ hvái ngăn mâu tơdroăng ki hiăng châ chiâng pêi pro tiô pơkâ hneăng Hôp kân má 13 dêi Đảng a mâu kơpong têa kơxĭ, chuăn rơlố sap a poăng hneăng nah troh nôkố. 

Tơdroăng mê po a 20 chôu hâi lơ 12/8 la ngiâ kô ah ai 3 tơdroăng ăm ‘nâi khât ing mâu tơdroăng pơxái : “Tuăn tơmiât têa kơxĭ’’, Việt Nam la ngiâ pêi mâu tơdroăng cheăng kro mơdrŏng ing têa kơxĭ’’, Việt Nam la ngiâ kô mơnhông rơdêi cheăng’na têa kơxĭ’’.  A rôh hôp ƀă khu chêh hlá tơbeăng, pôa Phạm Mạnh Hùng, Ngế xiâm phŏ pơkuâ Rơ’jíu xiâm Việt Nam, Ngế xiâm phŏ pơkuâ hnê mơhno, Ngế Pơkuâ Khu tơrŭm cheăng Tơdroăng tơpui ‘na ngê̆ thuât “Rơdêi kro mơdrŏng ing têa kơxĭ pơlê’’; tối Việt Nam cho tơnêi têa ai têa kơxĭ ƀă tơdroăng púi vâ ta ah kâi pêi cheăng kro mơdrŏng ing têa kơxĭ, vâ mơhnhôk tuăn mơ-eăm hâk tơngăm, nhoăm hdroâng mơngế, ai tuăn mơ-eăm khên tơnôu vâ kring vế ƀă pơtối rak vế pêi  mâu tơdroăng cheăng ki hiăng ai hlâu a têa kơxĭ, chuăn rơlố Việt Nam.