Kố cho mâu toăng hngêi châ Kŏng ti xiâm on tơhrik Peăng tơdế tơnêi têa (EVNCPC) tŏng kum kơxô̆ liăn mơjiâng tung hơnăm 2023. Pơtối mê, rêm toăng hngêi châ kơvâ on tơhrik tŏng kum 60 rơtuh liăn, khu râ kăn pơkuâ rơtế rơpŏng, kuăn pơlê tung kơtâu veăng tơlo vâ mơjiâng hngêi kân lĕm rơdâ.

Rơtế ƀă tơdroăng tŏng kum hngêi, on tơhrik Dak Lak ối diâp rêm rơpŏng 1 toăng tơvi rơtế mâu kế tơmeăm khoăng on tơhrik kum tung rêh ối. Châ ‘nâi rơtế ƀă Dak Lak, tung hơnăm 2023, EVNCPC hiăng tŏng kum mơjiâng 70 toăng hngêi diâp ăm mâu rơpŏng kơtiê, rơpŏng ai troăng hơlâ tŏng kum tung 13 kong pơlê peăng tơdế tơnêi têa ƀă Tây Nguyên, ƀă tâi tâng kơxô̆ liăn lối 4,2 rơtal liăn. Mâu toăng hngêi nếo hiăng kum mâu rơpŏng tơniăn tíu ối, ai ivá vâ mơ-eăm tơkâ hluâ tơdroăng pá puât.