VOV4.Xơ Đăng - Hrĭng xiâm loăng hngó tung bêng 8, pơlê kong kơdrâm Đà Lạt, Lâm Đồng tro kếo ‘nhê. Ki rơhêng vâ tối, tơdroăng kếo ‘nhê kong kố ôh tá xê vâ xo loăng laga ƀă xiâm kối ki lâi mê kơ koan cheăng dế séa ngăn vâ mơnhên. Tíu kong tro ko ‘nhê ối tung lô A, lô B, khoăn 15, poh xá 148B, bêng 8, pơlê kong kơdrâm Đà Lạt, Lâm Đồng, kơpong kong tât khía xua Khu pơkuâ kong pơkuâ.

Hrĭng xiâm loăng hngó tât khía Đà Lạt tro mâu ngế ‘mêi tong kếo ‘nhê

Akố, hrĭng xiâm loăng hngó kân sap ing 20 troh 60 cm hiăng tro kếo kơtong. Tung kơxô̆ kố ai loăng hngó pái kơtâ hlá hiăng ai mơngiơk trĭng laga xuân ai hên loăng ối drêh lĕm, hlá drêh, xiâm lo chá. Roh ko ‘nhê kong tá hâi ‘nâi chôu lâi vâi tong kếo, laga tung kơxo lơ 17/5, mâu kơ koan cheăng dêi pơlê kong kơdrâm Đà Lạt hiăng thâ mot séa ngăn, tơrŭm riân ngăn loăng, khăm tíu ko kếo loăng, pro hô sơ vâ ti tăng ngế ki tong kếo loăng.

A Sa Ly tơplôu ƀă tơbleăng