Tơmối Việt Nam hâk ƀă rơhêng vâ ‘nâi hên tâ ƀă mâu tour ôm hyô tung tơnêi têa lăm ngăn kong kế a ngo ngối, kơpong kong ngo, ƀă hên tơmeăm ôm hyô ing tơmiât pêi rơkê ƀă ai hên hĭn tơmeăm kong kế vâ châ hlo châ tâ. Môi ngế tơmối tối ăm ‘nâi:

‘’Drêng vêh a kố ai hên tơdroăng môi tiah vo plong, hvât chhéa tăng rup ká, pik mơngiơk ăm chế, vê prế, lăm ngăn pơlê ƀă châ hlo châ tâ tơdroăng pế pơchên tơmeăm mâu kơchâi kâ dêi pơlê. Á hâk vâ ‘nâng’’.

Tơmối ôm hyô Việt Nam kơjo ôm hyô tung tơnêi têa xua klêi kơ’nâi tâi pơreăng COVID-19, tơdroăng prôk lăm ối trâm hên pá puât, yă to kơnâ, kơlo tơniăn ‘na pơreăng xuân tá hâi tơniăn. Tơdroăng mê vâ mơnhên xua ti lâi hơnăm 2022, tíu ôm hyô tung tơnêi têa kơdrâm phiu ro. Kơnôm liăn tơtro, tơmeăm hên, tơdroăng ki tơniăn ‘na pơreăng tơniăn lĕm tâ, thăm nếo tơmối ôh tá châ lăm hêi klêi kơ’nâi mâu hâi khế ton klâ kơtăn, xua mê, rah lăm hêi ôm hyô tung tơnêi têa cho troăng pêi pro ki tro.

Kơvâ ôm hyô Việt Nam châ pơkâ pêi tung hơnăm 2022 tơdah 65 rơtuh roh tơmối, vâ chê 60 rơtuh roh tơmối tung tơnêi têa ƀă 5 roh tơmối lâp plâi tơnêi. Troh nôkố, kơxô̆ tơmối tung tơnêi têa hiăng châ tiô pơkâ rĕng tâ, hluâ pơkâ mơ’no, ƀă lối 101 rơtuh, tâk lối 1,5 xôh tâng pơchông pơkâ mơ’no. Pôa Nguyễn Qúy Phương - Ngế xiâm pơkuâ ‘na ôm hyô – Kơ koan xiâm pơkuâ ôm hyô mơnhên:

‘’Hên khu tê mơdró ôm hyô klêi mê mâu khu tê mơdró tíu koi ối pơtê xuân tối hiăng tơbrêi tơbrêh xua pêi cheăng đi đo xua tơdroăng kal vâ rĕng dêi tomối. Xua mê vâ tơleăng tơdroăng kố, pakĭng mơdêk ki dâi lĕm mơngế pêi cheăng, ngin xuân mơnhên, môi cho pro mơdon rơnó ki hên tơmối ôm hyô, má péa cho 1 hơnăm pin thế pêi pro ki vâ iâ 2 rơnó ôm hyô tung tơnêi têa’’.

Mơhé tíu ôm hyô tung tơnêi têa ai hên tơdroăng tơtêk ƀă cho môi tung mâu tơnêi têa apoăng tung kơpong peăng mâ hâi lo pá hdroh châu Á vêh lôu péa klêi kơ’nâi tâi pơreăng COVID-19 laga Việt Nam pơtối ai tơdroăng ki pro tơniăn kơvâ ôm hyô iâ má môi tâng pơchông ƀă mâu kong têa tung kơpong. 18,1% cho kơxô̆ ki iâ kŭn tâng pơchông ƀă tơdroăng rak tơniăn ôm hyô châ kơlo 26 troh 31% dêi mâu kong têa ki achê môi tiah Siam, Singapore, Malaysia.

Kơxô̆ tơmối lâp plâi tơnêi troh Việt Nam tung hơnăm kố châ 3,5 rơtuh roh, bu châ 70%  tâng pơchông ƀă pơkâ mơ’no. Mâu tíu ôm hyô tiah hmâ sap ing ton nah dêi Việt Nam môi tiah Sinuâ tá hâi lôu péa, tơ’nôm mâu tơdroăng kal kí, kơdroh cheăng kâ cho xiâm kối tơdjâk pro tơmối ing châu Âu kơdroh vâ troh. Laga, hên ‘’tíu ki kreăng’’, ‘’tíu kât’’, chiâng pro mơdât ăm tơdroăng tơdah tơmối lâp plâi tơnêi cho xiâm kối ing tơná pin, chiâng ai tơdroăng kố.

Ai hên tơmối lâp plâi tơnêi mot a Việt Nam hiăng tối cho troăng hơlâ pro visa, ƀă pro hên mơ-éa ‘nâng, ôh tá tơdrăng pro vâi trâm hên pá puât.

Nâ Sandra, 26 hơnăm, mơngế Thụy Sĩ tối: Á tâ pá puât tung tơdroăng ti tăng mâu trang web khât dêi Chin phuh vâ chiâng pâ apply visa tơ’lêi hlâu. ‘Na tơdroăng visa tung pơla ‘nâng ‘nâi, pá vâ pro mơdon hâi khế ối dêi á a Việt Nam xua pro mơ-éa hên ‘nâng’’.

Troăng hơlâ pro mơ-éa mơnhên dêi Việt Nam cho ối hên ‘nâng tơdroăng ki mơdât. Tơdroăng kố pro pá hên ƀă tơmối lâp plâi tơnêi. Jâ Đào Thị  Nga – Kăn pơkuâ ‘na Tê mơdró hngêi ăm tơmối koi pơtê Little Charm Hanoi Hostel tối:

‘’Tơdroăng apoăng, cho tơdroăng kơ-êng tơdjuôm dêi rơpâu ngế tơmối troh ƀă Việt Nam klêi kơ’nâi tâi COVID-19 trâm hên pá puât tung tơdroăng vâi vâ tơ’nôm hâi khế visa vâ ối hên tâ tâng pơchông ƀă visa mê vâi ối châ ăm cho 15 hâi mê nôkố, troăng hơlâ dêi tơnêi têa cho bu ăm visa 15 hâi. Tâng tơmối vâ ối tơ’nôm nếo mê pơklât thế tơmối thế lo ing Việt Nam, kơneăng a kong têa ki ê ‘nôi ƀă klêi mê vêh nếo. Tiah mê cho pá ăm tơmối, pro ăm vâi thế xúa tơ’nôm liăn ngân ăm troăng kơneăng, hâi khế vâi prôk pơtê, lăm ngăn lăm hêi tro toh xua mê vâi ôh tá phiu ro ôh’’.

Nôkố, Siam hiăng ôh tá ăm êa xúa visa tơmối ôm hyô ăm 65 kong têa, ƀă hâi khế ối 30 troh 45 hâi, thăm nếo troh 90 hâi ƀă chiâng mot lo hên xôh. Tơdrêng amê, troh nôkố, Việt Nam xuân ôh tá ăm êa xúa visa ăm 24 kong têa, ƀă hâi khế ối cho 15 hâi ƀă mot lo 1 xôh. Laga, tiô mâu ngế rơkê ôm hyô, vâ tah lôi pá puât ăm ôm hyô mê thế pơ’lêh tơdroăng pro mơ-éa mơnhên troh ối cho tá hâi tŭm. Kal ai troăng ngăn tâi tâng tŭm tơdroăng, tá tơdroăng pơtâng tối, tơbleăng, pơto, prôk lăm, ối pơtê, tê mơdró xuân môi tiah mơngế pêi cheăng.

Vâ tah lôi mâu tơdroăng ki pro pá ƀă mâu tơdroăng ki tá hâi tro ối ai tung tơdroăng lôu péa tơdah tơmối lâp plâi tơnêi, pôa Nguyễn Công Hoan – Kăn pơkuâ ‘na pơtâng tối tiô tơdroăng kal ƀă pơ’lêh xúa kơmăi kơmok – Khu pơkuâ ôm hyô Việt Nam pơkâ mâu troăng pêi:

‘’Nôkố, apoăng pin thế ai hên tíu troh ôm hyô, ôh tá tơkŭm a mâu kong têa ki tiô khôi vâi krâ nah xếo mê kal po rơdâ kong têa ki nếo, cho mâu kong têa ai tơdroăng cheăng kâ tơniăn, tơmối ai ivá chêl ăm liăn. Má 2, cho mâu kong têa ki tơ’lêi ‘na troăng kơneăng troh Việt Nam. Tơdroăng má péa cho tơdroăng visa. Xua tâng mơnhên châ kong têa laga ôh tá ai troăng pêi pro vâ ôm hyô, mơhnhôk tơmối troh ƀă Việt Nam mê xuân cho tơmeăm ki ai hlâu tê ôh tá châ tơƀrê klâi’’.

Tung hơnăm 2023, Việt Nam châ pơkâ tơdah 10 rơtuh tơmối lâp plâi tơnêi. Vâ châ tơƀrê pơkâ kố, pin thế chôa ‘lâng tah lôi mâu ‘’tơdroăng’’ pro mơdât tơdroăng tơdah tơmối. Tơdrêng amê, kal ai pơkâ nhên ing mơjiâng tơmeăm, tơdah troh mâu troăng hơlâ tâi tâng, ki rơhêng vâ tối cho tah lôi tíu ki kreăng kân má môi cho visa. Tơdroăng rak tơniăn mâu tơdroăng pá puât, xúa mâu roh tơ’lêi hlâu ƀă mơnhông mơdêk tơdrêng amê ôm hyô lâp plâi tơnêi ƀă ôm hyô tung tơnêi têa kô kum mơjiâng ăm tơdroăng mơnhông mơdêk ivá tơbriât dêi tơmối ôm hyô Việt Nam.